ایم کیوایم آزادی اظہار رائے اور شہری آزادی کی مکمل حامی ہے، ڈاکٹر فاروق ستار

کراچی ۔۔۔9 فروری 2013ء 

ایم کیوایم کی رابطہ کمیٹی کے ڈپٹی کنوینر ڈاکٹر فاروق ستار نے کہا ہے کہ ایم کیوایم آزادی اظہار رائے اور شہری آزادی کی مکمل حامی ہے ، ایم کیوایم نے ارتقاء کا سفر طے کیا ہے ،ہم آئین کی بالادستی ، لوکل باڈیز کے اختیارات کی نچلی سطح پر منتقلی کا عمل چاہتے ہیں ان خیالات کااظہار انہوں نے ہفتہ کے روز لال قلعہ گراؤنڈ عزیز آباد میں (Council Of Pakistan Newspaper Editors(CPNEکے نمائندہ وفد کے اعزاز میں دیئے گئے ظہرانہ کی تقریب سے خطاب کرتے ہوئے کیا ۔اس موقع پرسی پی این ای کے رحمت علی رازی ، شاہین قریشی ، عبدالجبار خٹک ، مختا ر عقل ، دردانہ شہاب ، جاوید مہر سمشی ، غلام ربانی، طاہر نجمی، وحید جمال، زاہد ہ عباسی، انور فاروقی، اور سجاد قاضی اکبر کے علاوہ حق پرست وزراء ، ارکان قومی وصوبائی اسمبلی بھی موجود تھے ۔ تقریب سے سی پی این ای کے صدر جمیل اطہر ، جنرل سیکریٹری عامر محمود ،خوشنود علی خان ،سینئر صحافی ضیاء الدین ،کالم نگار ، مدیر وصحافی الطاف حسین قریشی اورامتیاز عالم نے بھی خیالات کا اظہار کیا ۔ ڈاکٹر فارو ق ستار نے اپنے خطاب میں کہا کہ ریاست کے قبلے کودرست کرنے کی ضرورت ہے ، ہمیں جمہوری عمل کے تسلسل کو قائم رکھنے ، انتخابات کے ہر حال میں انعقاد کے ساتھ ساتھ پاکستان کے در پیش اندورنی و بیرورنی مسائل کے حل پر توجہ دینے کی ضرورت ہے ۔جمہوری عمل کے جاری و ساری رہنے سے ہی پاکستان کے مظلوم و محروم عوام کو ان کے بنیادی حقوق کی فراہمی ممکن ہے ۔انہوں نے کہا کہ ایم کیوایم پاکستان کی واحد جماعت ہے جس نے مڈل کلاس سے جنم لیا ہے ایم کیوایم کی جانب سے متوسط اور غریب طبقے کے پڑھے لکھے نوجوانوں کو ایوانوں میں بھیجا ، ہم کرپٹ پولیٹیکل کلچر اور اسٹیٹس کو کے خلاف ہیں ۔ ڈاکٹر فاروق ستار نے سی پی این ای کے پاکستان بھر سے آئے ہوئے نمائندہ وفد کو دل کی گہرائیوں سے خوش آمدید کہا اور قائد تحریک جناب الطاف حسین اور ایم کیوایم رابطہ کمیٹی کی جانب سے وفد کا شکریہ ادا کیا ۔اس مو قع وفد کے ارکان نے کہاکہ ایم کیوایم وہ واحدسیاسی جماعت ہے جس کا سماجی شعبے میں خدمات کا دائرہ بہت وسیع ہے ، جناب الطاف حسین کے پیغام کے ساتھ آپ پاکستان کے عوام کی خدمت کررہے ہیں ۔ انہو ں نے کہاکہ زرعی ٹیکس کے نفاذکابل ضرور پیش ہونا چاہیے،ملک بھر میں مقامی حکومتوں کا قیام اشد ضروری ہے کراچی میں امن و امان کے قیام میں ہی پاکستان کی بقاء وسلامتی ہے کراچی ایک میٹرو پولیٹین شہر ہے جہاں کمیونٹی پولیس کانظام قائم کرنے کی ضرورت ہے ۔ہم سب پاکستان میں جمہوریت کو پھلتا پھولتا دیکھنا چاہتے ہیں جہاں ایک ایسا مثالی معاشرہ قائم ہو جہاں بلاتفریق تمام پاکستانیوں کو ان کے جائز حقوق مل سکیں۔اس مو قع پر سی پی این ای وفد نے اراکین رابطہ کمیٹی سے مختلف موضوعات پر تبادلہ خیال کرتے ہوئے اس بات پر اتفاق کیا کہ آئندہ بھی رابطوں کا مضبوط سلسلہ جاری وساری رہے گا۔ سی پی این ای نمائندہ وفدنے نائن زیرو مدعو کرنے پر جناب الطاف حسین اور ایم کیوایم رابطہ کمیٹی کا شکریہ ادا کیا ۔بعدازا ں ڈاکٹر فاروق ستار و اراکین رابطہ کمیٹی نے سی پی این ای کے نمائندہ وفد کوقائد تحریک جناب الطاف حسین کی رہائشگاہ سمیت ایم کیوایم کے مختلف شعبہ جات کا دورہ کرایاجس پر نمائندہ وفد نے ایم کیوایم کے جدید میڈیا سیل کوسراہا ،اس مو قع پر مختلف شعبہ جات کے ذمہ داران بھی موجود تھے۔ ڈاکٹر فاروق ستارنے دیگر اراکین رابطہ کمیٹی نے سی پی این ای کے نمائندہ وفد کو سندھ کی ثقافت سندھی ٹوپی و اجرک کے تحائف بھی پیش کیے