ڈاکٹرطاہرالقادری کاایم کیوایم کے قائد الطاف حسین کو فون ،رکن سندھ اسمبلی منظرامام کی شہادت پر تعزیت کی

کراچی :۔۔۔۔19جنوری ،2013ء 

متحد ہ قومی موومنٹ کے زیرِ اہتمام حق پرست رکن سندھ اسمبلی سیّدمنظر امام شہید اور دیگر شہدا ء محمد عمران مراد شہید، عمران خان شہید ، ساجد احمد شہید کے سوئم کے اجتماعات کا انعقاد ملک بھر میں کیا گیا جن میں شہدا ء کے روح کے ایصال ثواب کے لئے قرآن خوانی اور فاتحہ کی گئی اور انہیں زبر دست خراج عقیدت پیش کیا گیا ۔ سوئم کا مرکزی اجتماع ایم کیوایم کے مرکز نائن زیرو سے متصل لال قلعہ گراؤنڈعزیز آبادمیں منعقد ہوا جس میں ایم کیوایم کی رابطہ کمیٹی کے ڈپٹی کنوینرز ڈاکٹر فارق ستار ، انیس احمد قائم خانی ، محترمہ نسرین جلیل ، ڈاکٹر نصرت اراکین رابطہ کمیٹی توصیف خانزادہ ، شاہد لطیف ، کیف الوریٰ ، وسیم آفتاب ، گلفراز خان خٹک ،کنور خالد یونس ، واسع جلیل ، سلیم تاجک ، یوسف شاہوانی ، شاکر علی ، جاوید کاظمی ، کنور نوید ، مختلف سیاسی جماعتوں کے وفود ،حق پر ست سینیٹرز ، وزراء ، ارکان اسمبلی ، ایم کیوایم کے مختلف شعبہ جات کے ارکان ، علاقائی سیکٹر ویونٹ کمیٹیوں کے ذمہ دارا و کارکنان سمیت شہداء کے عزیز و اقارب نے بڑی تعداد میں شرکت کی ۔ بعدازاں سوئم کے اجتماع میں خشوع خضوع کے ساتھ مولانا تنویر الحق تھانوی نے اجتماعی دعاکرائی جس میں رکن سندھ اسمبلی منظر امام شہید و دیگر شہداء سمیت حق پرستی کی راہ میں شہید ہونیوالے تمام حق پرست شہدا ء کی مغفرت اور سوگواران کے لئے صبر جمیل ، شہر اور ملک میں انتہاء پسند ی اور دہشت گردی کے خاتمے ، ایم کیوایم کے مشن و مقصد کی کامیابی ، قائد تحریک جناب الطاف حسین کی درازی عمر کے لئے خصوصی دعائیں کی گئی ۔ کراچی کی طرح اندرونِ سندھ ،حیدر آباد ، میر پور خاص، سکھر ، نواب شاہ ، سانگھڑ، ٹنڈو الہ یار ، لاڑکانہ ، دادو ، بدین ، ٹھٹھہ، گھوٹکی ، خیر پور ، نو شہرو فیروز ، قمبر شہداد کوٹ ، شکار پور ، کشمور ، جیکب آباد ، پنجاب میں ملتان ، گجرانولہ ، راولپنڈی ، فیصل آباد ،لاہور ، کوئٹہ ،نصیر آباد ، خیبر پختونخوا میں گلگت و بلتستان ، دیامیر ، آزاد کشمیر میں ایم کیوایم کے ضلعی ، ڈسٹرکٹ ، زونل دفاتر پر رکن سندھ اسمبلی منظر امام شہید اور دیگر شہداء کے سوئم کے سلسلے میں قرآن خوانی و فاتحہ کے اجتماعات منعقد ہوئے جن میں تمام زونوں کے انچارجز و اراکین کمیٹی ، ذمہ داران و کارکنان نے بڑی تعداد میں شرکت کی اور شہداء کو زبر دست خراج عقیدت پیش کیا ۔ 

 

کراچی ۔۔۔19، جنوری 2013ء 

متحدہ قومی موومنٹ کی رابطہ کمیٹی کے ڈپٹی کنوینر ڈاکٹر فاروق ستار نے کہا ہے کہ حق پرست رکن سندھ اسمبلی منظر امام اور دیگر ساتھیوں کے سفاکانہ قتل کی واردات سے یہ بات ثابت ہوگئی ہے کہ ملک کو درپیس سب سے بڑا چیلنج دہشت گردی اور انتہاء پسندی ہے،اس چیلنج سے نمٹنے کیلئے حکومتی سطح پر جتنی جلد ہواتفاق رائے کے ذریعے قومی انسداد دہشت گردی پالیسی وضع کی جائے کیونکہ اس قومی پالیسی کے ذریعے آئندہ پاکستان کو پائیدار امن و استحکام دیا جاسکتا بلکہ ملک کو دہشت گردی سے نجات دلائی جاسکتی ہے ۔ ان خیالات کااظہار انہوں نے ہفتہ کے روز حق پرست رکن سندھ اسمبلی سید امنظر امام شہید ، ان کے ڈرائیور اور محافظ عمران مراد شہید ، عمرا خان شہید اورساجد احمد شہید کے لال قلعہ گراؤنڈ عزیز آباد میں منعقدہ مشترکہ سوئم کے اجتماع میں قرآن و فاتحہ خوانی کے بعد میڈیا کے نمائندوں سے گفتگو کرتے ہوئے کیا ۔ اس موقع پر رابطہ کمیٹی کے ارکان اور سید منظر امام شہید و دیگر شہداء کے سوگوار لواحقین بھی موجود تھے ۔ ڈاکتر فاروق ستار نے کہا کہ ملک کا کوئی بھی شعبہ ، گلی یا محلہ انتہاء پسندی اور دہشت گردی سے محفوظ نہیں ہے ، یہ وقت تقاضہ کررہا ہے کہ عوام اور سیاسی جماعتیں اختلافات بھلا کردہشت گردی کے چیلنج کے خلاف نہ صرف متحد بلکہ متحرک ہوجائیں ۔ انہوں نے کہاکہ دیگر سیاسی ومذہبی جماعتوں کو بھی دہشت گردی اور انتہا پسندی کا مقابلہ کرنے کیلئے سیاسی اختلافات کو بالائے طاق رکھ کر اس چیلنج کا مقابلہ اور قومی اتفاق رائے پیدا کرنا ہوگا ۔ انہوں نے کہاکہ ملک بھر میں دہشت گردی کے رجحان میں اضافہ ہورہا ہے اور اس صورتحال میں سیاسی ، سماجی سرگرمیاں اور انتخابات کی تیاریاں بھی ایک چیلنج بن گئیں ہیں ۔ انہوں نے کہاکہ سید منظر امام شریف النفس انسان اور ایم کیوایم کے سینئر کارکن تھے ، ان کی عوامی خدمات کسی سے ڈھکی چھپی نہیں ہیں اور ان کے سفاکانہ قتل کی واردات سے ہم ، شہید کے اہل خانہ اور پوری قوم ایک بڑے اثاثے سے محروم ہوگئی ہے ۔ انہوں نے کہاکہ سید منظر امام اور ان کے دیگر ساتھیوں کا بہیمانہ قتل بزدلانہ کارروائی اور کھلی دہشت گردی ہے اور اس درندگی کا مظاہرہ طالبان دہشت گردوں نے کیا ہے ۔ انہوں نے سید منظر امام شہید اور دیگر شہداء کے سوگوار لواحقین سے قائد تحریک جناب الطاف حسین اور ایم کیوایم کی رابطہ کمیٹی کی جانب سے تعزیت وہمدردی کااظہار کیا اور شہداء کے بلند درجات کیلئے دعا بھی کی ۔ ایک سوال کے جواب میں ڈاکٹر فارو ق ستار نے کہاکہ قائد تحریک جناب الطاف حسین گزشتہ 5برس سے ملک کو درپیش خارجی اور داخلی چیلنجوں کی کھل کر نشاندہی کرتے آئے ہیں ، اس سلسلے میں ہم مسلم لیگ ن ، اے این پی ، جماعت اسلامی ، تحریک انصاف ، پی پی پی ،اتحادی و اپوزیشن جماعتوں کے پاس بھی گئے ہیں ، کل اسلام آباد میں عوامی نیشنل پارٹی نے اس چیلنج سے نمٹنے کیلئے قومی کانفرنس بلانے کا عندیہ دیا ہے اور ایم کیوایم نے اس قومی کانفرنس میں شرکت کی دعوت قبول کرلی ہے ۔ انہوں نے اپیل کی کہ وہ جماعتیں جن میں دہشت گردی کے خلاف نظریاتی ہم آہنگی موجود ہے اتفاق رائے کریں ، محلہ کمیٹیاں بنائیں،رضاکاروں کا نظام وضع کریں اور ملک کے اداروں اور عوام کو فعال کرکے دہشت گردی کے عفریت سے نجات کیلئے ہر کوشش مثبت اور تعاون خلوص نیت کے ساتھ کیاجائے ۔ڈاکٹر فارو ق ستار نے صدر مملکت آصف علی زرداری اور وزیر اعظم راجہ پرویز اشرف سے مطالبہ کیا کہ ملک میں دہشت گردی سے کوئی محفوظ نہیں ہے لہٰذ ضرورت اس بات کی ہے کہ دہشت گردی میں ملوث عناصر اور سفاک قاتلوں کو گرفتار کرکے کیفر کردار تک پہنچایاجائے ۔