پاکستان ٹائمزنیوز کے دفترکوایم کیوایم کادفتر قراردینا قطعی غلط اورحقائق کے سراسر منافی ہے
پاکستان ٹائمز نیوز کے دفتر کا ایم کیو ایم یا اس کی تنظیمی سرگرمیوں سے کوئی تعلق نہیں ہے
ذرائع ابلاغ سے درخواست ہے کہ غیر مصدقہ معلومات کی اشاعت سے گریز کریں
ایم کیوایم لیگل ایڈکمیٹی کے سینئررکن ادریس علوی ایڈوکیٹ اورتحسین عباسی سمیت تمام گرفتارشدگان کوفی الفوررہاکیاجائے۔رابطہ کمیٹی متحدہ قومی موومنٹ
لندن……11جون 2026ء
متحدہ قومی موومنٹ کی رابطہ کمیٹی نے اپنے ایک بیان میں واضح الفاظ میں کہاہے کہ پولیس نے آج کراچی میں آئی آئی چندریگر روڈ پر واقع جس دفترپر چھاپہ مارکر ایم کیوایم کی لیگل ایڈکمیٹی کے سینئررکن ادریس علوی ایڈوکیٹ،تحسین عباسی اوردیگرافرادکوحراست میں لیاہے وہ ایم کیوایم کادفترنہیں ہے، بعض ذرائع ابلاغ کی جانب سے اس دفترکوایم کیوایم کادفتر قراردینا قطعی طورپر غلط اورحقائق کے سراسر منافی ہے۔حقیقت یہ ہے کہ مذکورہ دفتر سینئر صحافی اور یوٹیوبر تحسین عباسی صاحب کے پاکستان ٹائمزنیوز کا دفتر ہے۔ اس دفتر کو ایم کیو ایم کادفترقراردینا نہ صرف بے بنیاد ہے بلکہ عوام کو گمراہ کرنے کی ایک مذموم کوشش ہے۔ رابطہ کمیٹی اس خبر کی سختی سے تردید کرتی ہے اورواضح الفاظ میں کہتی ہے کہ پاکستان ٹائمز نیوز کے اس دفتر کا ایم کیو ایم یا اس کی تنظیمی سرگرمیوں سے کوئی تعلق نہیں ہے۔رابطہ کمیٹی نے ذرائع ابلاغ اور متعلقہ حلقوں سے درخواست کی ہے کہ وہ غیر مصدقہ معلومات کی اشاعت سے گریز کریں اور حقائق کو درست انداز میں عوام کے سامنے پیش کریں۔ رابطہ کمیٹی نے مطالبہ کیاہے کہ ایم کیوایم لیگل ایڈ کمیٹی کے سینئررکن ادریس علوی اورتحسین عباسی سمیت تمام گرفتارشدگان کوفی الفوررہاکیاجائے۔
٭٭٭٭٭