نومارچ کا دن صوبہ پنجاب میں غریبوں کے انقلاب کے آغاز کا دن ہوگا، الطاف حسین

لندن ۔۔26فروری 2014ء

متحدہ قومی موومنٹ کے قائد جناب الطاف حسین نے کہا ہے کہ 9مارچ کا دن صوبہ پنجاب میں غریبوں کے انقلاب کے آغاز کا دن ہوگا ، قرارداد پاکستان مارچ کے مہینہ میں لاہور میں منظور ہوئی تھی اور اب مارچ میں لاہور میں ایم کیوایم کے زیر اہتمام ہونے والا اجتماع بھی اسی یکجہتی ،جوش اور جذبہ کو اجاگر کر دے گا جسکا مظاہرہ قیام پاکستان کے موقع پر کیا گیا تھا۔ انہوں نے یہ بات بدھ کی شب ایم کیوایم لاہور کے دفتر میں ذمہ داروں ، کارکنوں اور ہمدردوں کے ایک اجتماع سے خطاب کرتے ہوئے کہی ۔جناب الطاف حسین نے کہا کہ کراچی میں ایم کیوایم کی تاریخی یکجہتی ریلی کے مثبت اثرات پورے پاکستان خصوصاًپنجاب میں سامنے آرہے ہیں اور پنجاب کے عوام والیہانہ طریقہ سے ایم کیوایم کے جرات مندانہ موقف کاخیر مقدم کر رہے ہیں ،یہ انتہائی خوشی کی بات ہے کہ اب غلط فہمیوں کے بادل چھٹ رہے ہیں اور مجھے امید ہے کہ اب پنجاب میں بھی حق پرستی کے نعرے گونجیں گے۔ جناب الطاف حسین نے کہا کہ انشااللہ 9مارچ کو لاہور میں ہونے والہ صوفیانہ اجتماع تاریخی ہوگا جس میں تمام مکاتب فکر سے تعلق رکھنے والے افراد شریک ہونگے ۔انہوں نے لاہور اور اس کے گرد ونواح کے علاقوں میں رہنے والے عوام سے کہا کہ وہ 9 مارچ کے اجتماع میں شرکت کے لئے لاہور کے نیو مسلم ٹاؤن میں واقع ایم کیوایم کے مرکزی دفتر پنجاب ہاؤ س میں اپنے نام لکھوائیں اور ملک میں صوفیا ئے کرام کے پیغام اور اتحاد ویکجہتی کی فضاء کے فروغ کے لئے اس اجتما ع میں زیادہ سے زیادہ تعداد میں شرکت کر کے اسے کامیاب بنائیں ۔جناب الطاف حسین نے کہا کہ اسلام کے فروغ میں صوفیائے کرام کا کردار ناقابل فراموش ہے اور پاکستان بھی صوفیائے کرام کی برکتوں کے طفیل وجود میں آیا ۔9مارچ کااجتماع بھی صوفیائے کرام کے اس پیغام کو عام کرنے کے لئے ہے ۔جناب الطاف حسین نے لاہور میں ایم کیوایم کے اجتماع کی تیاریوں میں دن رات مصروف رہنے والے تمام ذمہ داران و کارکنوں کو زبر دست خراج تحسین اور شاباش دی ۔جناب الطاف حسین نے مخیرحضرات سے اپیل کی کہ وہ لاہورمیں منعقد ہونے والے اجتماع کے سلسلے میں دل کھول کر عطیات دیں ۔