ڈاکٹر نصرت شوکت نے سن چیریٹی کے زیر اہتمام عید الاضحی کے موقع پر قربانی کیلئے خریدے گئے جانوروں کا اورنگی ٹاؤن جاکر معائنہ کیا
فلاحی سرگرمیوں میں سن چیریٹی اپنا ایک معیار رکھتی ہے ، ڈاکٹر نصرت شوکت
کراچی ۔۔۔5، اکتوبر2014ء
متحدہ قومی موومنٹ کی رابطہ کمیٹی کے ڈپٹی کنوینر ڈاکٹر نصرت شوکت نے سن چیریٹی کے زیراہتمام عید الاضحی کے موقع پر قربانی کیلئے خریدے گئے جانوروں کا اورنگی ٹاؤن جاکر معائنہ کیااوران کی دیکھ بھال کے انتظامات کا جائزہ لیا ۔ سن چیریٹی کے تحت ہر سال امریکہ اور کینیڈا میں مقیم پاکستانیوں کی جانب سے قربانی کے جانور بڑی تعداد میں ذبح کئے جاتے ہیں جن کا گوشت غریب و مستحقین میں تقسیم کیا جاتا ہے ۔ اس موقع پر ڈاکٹر نصرت شوکت نے سن چیریٹی کے ذمہ داران سے گفتگو کرتے ہوئے کہاکہ فلاحی سرگرمیوں میں سن چیریٹی اپنا ایک معیار رکھتی ہے اور مذہبی تہواروں کے موقع پر اس ادارے کی جانب سے بڑھ چڑھ حصہ لینا اور دکھی انسانیت کی خدمت کا ذریعہ بننااچھی روایت ہے جسے برقرار رکھنے پر سن چیریٹی کے ذمہ داران خراج تحسین کے مستحق ہیں ۔