بلاول بھٹو کے بیان سے جنوبی پنجاب کے عوام کے جذبات مجروح ہوئے ہیں، میاں عتیق
بلاول بھٹو نے’’ مرسوں مرسوں ، پنجاب نہ ڈیسوں ‘‘، کہہ کرجنوبی پنجاب صوبے کی کھلی مخالفت کردی
پاکستان کی سلامتی وبقاء اور ترقی وخوشحالی کیلئے ملک میں انتظامی بنیادوں پرنئے صوبوں کا قیام ناگزیر ہے، میاں عتیق
جوعناصر پاکستان میں نئے صوبوں کے قیام کی مخالفت کررہے ہیں وہ پاکستان ، عوام اور جمہوریت کے دشمن ہیں
راولپنڈی ۔۔۔19، ستمبر2014
متحدہ قومی موومنٹ کی رابطہ کمیٹی نے رکن میاں عتیق نے پیپلزپارٹی کے سربراہ بلاول بھٹو زرداری کی جانب سے جنوبی پنجاب صوبے کی مخالفت کی سخت ترین الفاظ میں مذمت کرتے ہوئے کہاہے کہ بلاول بھٹو کے بیان سے جنوبی پنجاب کے عوام کے جذبات مجروح ہوئے ہیں۔ ایک بیان میں میاں عتیق نے کہاہے کہ حقوق سے محروم جنوبی پنجاب کے عوام علیحدہ صوبے کا مطالبہ کررہے ہیں اور پیپلزپارٹی قومی اسمبلی میں جنوبی پنجاب صوبے کی قرارداد پیش کرچکی ہے لیکن آج بلاول بھٹو نے دوعملی کا مظاہرہ کرتے ہوئے یہ بیان دیکرکہ ’’مرسوں مرسوں ، پنجاب نہ ڈیسوں ،‘‘ جنوبی پنجاب صوبے کی کھلی مخالفت کردی ہے اور اس بیان سے جنوبی پنجاب کے عوام کی دل آزاری ہوئی جس کی جتنی بھی مذمت کی جائے کم ہے ۔میاں عتیق نے کہاکہ پاکستان کی سلامتی وبقاء اور ترقی وخوشحالی کیلئے ملک میں انتظامی بنیادوں پرنئے صوبوں کا قیام ناگزیر ہے اورجوعناصر پاکستان میں نئے صوبوں کے قیام کی مخالفت کررہے ہیں وہ پاکستان ، عوام اور جمہوریت کے دشمن ہیں۔