ایم کیوایم کی کامیاب ریلی پر سابق وفاقی وزیرداخلہ رحمان ملک کی الطاف حسین کو مبارکباد

لندن۔۔۔23، فروری2014ء

سابق وفاقی وزیرداخلہ اور پیپلزپارٹی اوورسیز کے صدر رحمان ملک نے ایم کیوایم کے قائد جناب الطاف حسین اور رابطہ کمیٹی کے تمام ارکان کو طالبان دہشت گردوں کے خلاف نبردآزما مسلح افواج اوردیگر قانون نافذ کرنے والے اداروں سے اظہاریکجہتی کیلئے تاریخ ساز یکجہتی ریلی کے انعقاد پر دلی مبارکباد پیش کی ہے۔ ایم کیوایم انٹرنیشنل سیکریٹریٹ لندن میں رابطہ کمیٹی کے ڈپٹی کنوینر ندیم نصرت سے ٹیلی فون پر بات چیت کرتے ہوئے انہوں نے کہاکہ ملک کی بقاء وسلامتی اور طالبان دہشت گردوں سے متعلق جناب الطاف حسین نے جوفکروفلسفہ بیان کیا ہے میں اس کی مکمل تائید کرتا ہوں۔ اگر کراچی میں طالبانائزیشن کے حوالہ سے جناب الطاف حسین کے خدشات کامذاق اڑانے کے بجائے سنجیدگی سے غورکیا جاتا تو طالبان کی دہشت گردوں کے ہاتھوں قیمتی جانیں ضائع نہ ہوتیں۔ ندیم نصرت نے رحمان ملک کو بھی ایم کیوایم کے تحت یکجہتی ریلی کی کامیابی کی مبارکباد پیش کی اور ان کا شکریہ ادا کیا۔