ایم کیوایم ساؤتھ افریقہ کے زیراہتمام قائدتحریک الطاف حسین کی 61 ویں سالگرہ بھرپورجوش وخروش سے منائی گئی

جوہانسبرگ۔۔۔ 20 ستمبر2014ء

ایم کیوایم ساؤتھ افریقہ کے زیراہتمام ایم کیوایم کے قائدجناب الطاف حسین کی 61 ویں سالگرہ بھرپورجوش وخروش سے منائی گئی۔اس مرتبہ جناب الطاف حسین کی سالگرہ کی تقریب جوہانسبرگ کے علاقے فورڈزبرگ میں ساؤتھ افریقہ کے آنجہانی رہنمانیلسن مینڈیلاکی رہائشگاہ پرمنعقدکی گئی ۔تفصیلات کے مطابق سالگرہ کے اجتماع میں شرکت کیلئے ایم کیوایم کے کارکنوں اورہمدردوں کے قافلے فورڈزبرگ میں نیلسن مینڈیلا کے آبائی علاقے سوئیٹو (Sweto) میں داخل ہوئے توساؤتھ افریقہ کی حکمراں جماعت افریقین نیشنل کانگریس کے کارکنوں نے ان کاشانداراستقبال کیااور قافلوں پر پھولوں کی پتیاں نچھاور کیں ۔اس موقع پرایم کیوایم ساؤتھ افریقہ کے کارکنوں نے استقبال پر مقامی شہریوں کاشکریہ اداکیااوربچوں میں ایم کیوایم کی جانب سے تحائف تقسیم کئے ۔جناب الطاف حسین کی 61ویں سالگرہ کے سلسلے میں سوئیٹو کے مقامی کمیونٹی سینٹرمیں اجتماع منعقد کیاگیاجس میں ایم کیوایم ساؤتھ افریقہ یونٹ کے کارکنوں،مختلف شہروں سے آئے ہوئے پاکستانی نوجوانوں، خواتین، بزرگوں اوربچوں کے ساتھ ساتھ افریقن نیشنل کانگریس کے مقامی رہنماؤں اور کارکنوں نے بھی شرکت کی ۔ہال میں ایم کیوایم اورساؤتھ افریقہ کے پرچموں کے ساتھ ساتھ جناب الطاف حسین اورساؤتھ افریقہ کے آنجہانی رہنمانیلسن مینڈیلا کی بڑی بڑی تصاویربھی لگائی گئی تھیں۔ اس موقع پر ایم کیوایم ساؤتھ افریقہ کے آرگنائزراوردیگرعہدیداروں نے اپنے خطاب میں ایم کیوایم کے بانی وقائدجناب الطاف حسین کی شخصیت اورجدوجہد پر روشنی ڈالی۔اس موقع پر افریقن نیشنل کانگریس کے مقامی رہنماؤں نے بھی خطاب کیااورپاکستان کے محروم عوام کے لئے جناب الطاف حسین کی جدوجہدپر انہیں زبردست خراج تحسین پیش کیا اورکہاکہ محروم عوام کیلئے جناب الطاف حسین اور نیلسن مینڈیلا کی جدوجہدمیں مماثلت پائی جاتی ہے ۔ بعدازاں ایم کیوایم ساؤتھ افریقہ کے ذمہ داران وکارکنان نے افریقن نیشنل کانگریس کے رہنماؤں کے ہمراہ سوئیٹومیں واقع آنجہانی نیلسن مینڈیلا کی تاریخی رہائش گاہ کے اندرجاکرجناب الطاف حسین کی سالگرہ کاکیک کاٹا۔اس موقع پر کارکنوں نے ایم کیوایم کامقبول تنظیمی ترانہ ’’ ساتھی ‘‘ گایااورجناب الطاف حسین کے لئے زوردارنعرے لگائے ۔

*****