ملک میں نئے صوبوں کے قیام سے غریب عوام کے حالات بہتر ہوں گے، رکن رابطہ کمیٹی افتخار اکبر رندھاوا

لاہور۔۔۔16ستمبر2014ء

متحدہ قومی موومنٹ کی رابطہ کمیٹی کے رکن افتخار اکبر رندھاوا نے 20نئے صوبوں سے متعلق جناب الطاف حسین کے بیان کی تائید کرتے ہوئے نئے صوبوں کے قیام کو ملک میں ترقی ،خوشحالی اور معاشی و سماجی مسائل کے حل کے لئے انتہائی اہم قرار دیا ہے۔ ایک بیان میں افتخار اکبر رندھاوا نے کہا کہ انتطامی بنیادوں پر نئے صوبوں کا قیام ملک کی اشد ضرورت ہے اور اس عمل سے ملک کے مختلف حصوں میں بسنے والے غریب و محروم عوام کے حالات بہتر ہوں گے ۔ انہوں نے کہا کہ زیادہ صوبے ہونے سے ملک کمزور نہیں ہو ا کرتے بلکہ مضبوط ہوتے ہیں اورقائد تحریک الطاف حسین نے انتظامی بنیادوں پرنئے صوبوں کی تشکیل کی جو تجویز دی ہے وہ اس وقت ملک کی بقاء سلامتی کے لئے ضروری ہے ۔انہوں نے کہاکہ غریب عوام کے مسائل حل کرنے و مشکلات دور کرنے کیلئے ہمیں دنیا کے ترقی یافتہ اور جمہوری ممالک کے انتظام کا مطالعہ کرنا ہوگا اور ان ممالک کے ترقی یافتہ نظام سے اپنے ملک کے جمہوری نظام کا موازنہ کرنا ہوگا تاکہ ہم اپنے نظام کی خامیوں کو دور کرکے عوام کی شکایات کو بر وقت حل کر سکیں ۔