وزیراعظم نوازشریف بڑے پن کا مظاہرہ کرتے ہوئے بغیر کوئی وقت ضائع کئے ڈاکٹر طاہرالقادری اور عمران خان کو براہ راست مذاکرات کی دعوت دیں۔ الطاف حسین

لندن۔۔۔31 اگست 2014ء

متحدہ قومی موومنٹ کے قائدجناب الطاف حسین نے ایک بارپھر اپنی اس بات کودہرایاہے کہ ملک میں گزشتہ کئی روزسے جاری سیاسی بحران کے خاتمہ کیلئے وزیراعظم نوازشریف کوچاہیے کہ وہ بڑے پن کامظاہرہ کرتے ہوئے پاکستان عوامی تحریک کے سربراہ ڈاکٹر طاہرالقادری اورتحریک انصاف کے سربراہ عمران خان کوبراہ راست مذاکرات کی دعوت دیں۔ایک انٹرویو میں جناب الطاف حسین نے کہاکہ میں گزشتہ کئی روزسے حکمرانوں سے مسلسل یہی کہہ رہاہوں کہ معاملات کو مذاکرات، بات چیت اورافہام وتفہیم کے ذریعے حل کیاجائے اوراس مقصد کیلئے کسی بھی مثبت قدم سے گریز نہ کیاجائے۔انہوں نے کہا کہ میں نے کل بھی کہاتھا ، آج بھی کہااور ایک مرتبہ پھر وزیراعظم نوازشریف سے کہتاہوں کہ وہ بڑے پن کامظاہرہ کرتے ہوئے بغیرکوئی وقت ضائع کئے ڈاکٹر طاہرالقادری اورعمران خان کو براہ راست مذاکرات کی دعوت دیں اوراگروہ دونوں رہنماکسی ہچکچاہٹ کامظاہرہ کریں تووزیراعظم نوازشریف اس کواپنی انا کامسئلہ نہ بنائیں بلکہ اپنے رفقاء کے ساتھ ڈاکٹر طاہرالقادری اور عمران خان کے کنٹینرمیں خودچل کرجائیں اوراس وقت تک نہ اٹھیں جب تک معاملہ حل نہ ہواورافہام وتفہیم کے ذریعے کوئی بہتر حل نہ نکلے ۔انہوں نے کہا کہ موجودہ سیاسی بحران کے خاتمہ کیلئے کوششوں میں جتنی تاخیرکی جائے گی ملک کااتناہی نقصان ہوگا۔ جناب الطا ف حسین نے مظاہرین اورصحافیوں پر تشددکے واقعات پرافسوس کااظہارکرتے ہوئے ایک بار پھرحکومت سے کہاکہ ہرچیزکاعلاج گولی، گالی اورشیلنگ نہیں ہوتالہٰذا طاقت کے استعمال سے ہرقیمت پر گریز کیاجائے ۔انہوں نے تشدد کے واقعات میں جاں بحق ہونے والے افرادکے لواحقین سے دلی تعزیت کااظہارکیااورزخمیوں کی جلدصحتیابی کیلئے دعاکی۔