الطاف حسین کی بلوچستان یونین آف جرنلٹس کے سیکریٹری جنرل ارشاد مستوئی پر حملے کی مذمت، ارشاد مستوئی سمیت دیگر صحافیوں کی شہادت پر اظہار افسوس

لندن ۔۔۔28اگست 2014ء

متحد ہ قومی موومنٹ کے قائد الطاف حسین نے صوبہ بلوچستان کے دارالحکومت کوئٹہ میں نیوز ایجنسی کے دفتر پر نامعلوم مسلح افراد کی فائرنگ کے نتیجے میں بلوچستان یونین آف جرنلسٹ کے جنرل سیکریٹری ارشاد مستوئی سمیت نیوز ایجنسی کے 3ملازموں کے جاں بحق ہونے کے واقع کی شدید الفاظ میں مذمت کی ہے ۔ جناب الطاف حسین نے کہا کہ ملک میں صحافی برادری پر حملے اظہار رائے کی آزادی کے منافی ہیں اور دہشت گرد اس قسم کی کاروائیوں کے ذریعے صحافی برادری کو حق گوئی سے روکنا چاہتے ہیں۔ جناب الطاف حسین نے وفاقی وزیر داخلہ چوہدری نثار علی خان ، وزیر اعلیٰ بلوچستان ڈاکٹر عبد المالک بلوچ اور دیگر متعلقہ حکام سے مطالبہ کیا ہے کہ وہ اس افسوس ناک واقعے میں ملوث سفاک دہشت گردوں کے خلاف فی الفو ر کا ر روائی عمل میں لائیں اور ملک بھر میں صحافیوں کے جان ومال کے تحفظ کے لئے اقدامات کئے جائیں۔