پاکستان کو غریب و متوسط طبقہ سے جنم لینے والی سچی اور مخلص قیادت کی ضرورت ہے۔ الطاف حسین

لندن۔۔۔22، اگست2014ء

متحدہ قومی موومنٹ کے قائدجناب الطاف حسین نے کہاہے کہ پاکستان کوغریب ومتوسط طبقہ سے جنم لینے والی سچی اورمخلص قیادت کی ضرورت ہے اورمسائل کا شکارافرادہی ملک کومسائل کی دلدل سے نکال سکتے ہیں۔ انہوں نے یہ بات آج اسلام آبادمیں ایم کیوایم اپرپنجاب کے ذمہ داروں اورکارکنوں سے گفتگوکرتے ہوئے کہی۔ اس موقع پر رابطہ کمیٹی کے ارکان میاں عتیق، امین الحق اورعبدالحسیب بھی موجود تھے ۔ جناب الطاف حسین نے کہاکہ پاکستان قدرتی وسائل کی دولت سے مالا مال ہے مگر ہماری حکومتیں تیل، گیس، سونے اوردیگرمعدنیات کے ذخائرکوغیرملکی کمپنیوں کوٹھیکے پر دیتی ہیں اس طرح ہمارے قدرتی وسائل سے غیرملکی کمپنیاں فائدے اٹھاتی ہیں اورملک اس سے محروم ہوتاہے۔ انہوں نے کہاکہ ہمیں ملک کی تعمیروترقی کیلئے کام کرناہے اورایسی پالیسیاں بنانی ہیں جن سے ملک کوفائدہ ہو۔ جناب الطاف حسین نے پنڈی زون کے ذمہ داروں اورکارکنوں سے کہاکہ وہ تحریک کے پیغام کوپھیلانے کے لئے زیادہ سے زیادہ کوششیں ش کریں تاکہ ہم ملک کوخوشحال اورمضبوط ومستحکم بناسکیں اورمحروم عوام کوان کے حقوق دلاسکیں ۔انہوں نے دعاکی کہ اللہ تعالیٰ تحریک کے تمام ذمہ داران وکارکنان کو صحت وسلامتی اورخوشحالی عطاکرے اورتحریک کوملک کے گوشے گوشے میں پھیلائے ۔