مسلح دہشت گردوں کی فائرنگ سے ایم کیوایم پنجابی ،سرائیکی آرگنائزنگ کمیٹی کے کارکن سید احسن شہید کے بہیمانہ قتل پر رابطہ کمیٹی کااظہار مذمت

کراچی ۔۔۔30، جولائی 2014ء 

متحدہ قومی موومنٹ کی رابطہ کمیٹی نے ایم کیو ایم پنجابی ، سرائیکی آرگنائزنگ کمیٹی شاہ فیصل یونٹ 7کے کارکن سید احسن کے بہیمانہ قتل پر سخت ترین الفاظ میں مذمت کی ہے ۔ ایک بیان میں رابطہ کمیٹی نے کہاکہ گزشتہ کئی ماہ سے میں ایم کیو ایم کے بے گناہ کارکنوں کا تسلسل کے ساتھ قتل کا سلسلہ جاری ہے جبکہ دوسری جانب ذمہ داران و کارکنان کے گھروں پر چھاپوں اور گرفتاریوں کا سلسلہ بھی جاری ہے ۔مگر آج تک ایم کیو ایم کے کارکنان کے قتل میں ملوث کسی بھی ایک دہشتگرد کو گرفتار نہیں کیا گیا جس کی جتنی مذمت کی جائے کم ہے ۔ رابطہ کمیٹی نے صدر مملکت ممنون حسین ، وزیراعظم نواز شریف ، وفاقی وزیر داخلہ چوہدری نثار ، گورنر سندھ ڈاکٹر عشرت العباد اور وزیراعلیٰ سندھ سید قائم علی شاہ سے مطالبہ کیا کہ سید احسن کے سفاک دہشت گرد قاتلوں کو فی الفور گرفتار کیا جائے ، سفاک دہشت گردوں کو عبرتناک سزا دی جائے اور ایم کیو ایم کے کارکنان کے ساتھ ہونے والے غیر منصفانہ ، غیر قانونی ، غیر انسانی سلوک کا سلسلہ بند کیا جائے ۔رابطہ کمیٹی نے سید احسن شہید کے تمام سوگوار لواحقین سے دلی تعزیت وہمدردی کااظہا رکرتے ہوئے انہیں صبر کی تلقین کی اور دعا کی کہ اللہ تعالیٰ شہید کو جنت الفردوس میں اعلیٰ مقام عطا فرمائے اور سوگواران کو یہ صدمہ برداشت کرنے کا حوصلہ عطاکرے ۔