ایم کیوایم ناظم آباد گلبہار سیکٹر یونٹ 169 کے کارکن محمد عابد شہید کے بہیمانہ قتل پر رابطہ کمیٹی کا اظہار مذمت

کراچی :۔۔۔22؍ جولائی 2014ء

متحدہ قومی موومنٹ کی رابطہ کمیٹی نے ایم کیو ایم ناظم آباد گلبہار سیکٹر یونٹ 169کے کارکن محمد عابد کے بہیمانہ قتل پر شدید الفاظ میں مذمت کا اظہار کرتے ہوئے واقعہ کو کھلی دہشت گردی قرار دیا ہے ۔ ایک بیان میں رابطہ کمیٹی نے کہا کہ انسانی زندگیوں کا تحفظ حکومت کی ذمہ داریوں میں آتا ہے مگر افسوس ہے کہ دہشت عناصر نہ صرف آزادانہ گھوم رہے ہیں بلکہ قتل و غارتگری کے واقعات بھی تسلسل کے ساتھ کررہے ہیں اس کے باوجود ان دہشت گردوں کو گرفتار نہ کیا جانا غور طلب بلکہ معنی خیز ہے جس پر جتنی مذمت کی جائے کم ہے ۔ رابطہ کمیٹی نے گورنر سندھ ڈاکٹر عشرت العباد خان ، وزیراعلیٰ سندھ قائم علی شاہ سے مطالبہ کیا ہے کہ محمد عابد شہید کے قتل کا فی الفور نوٹس لیا جائے اور واقعہ میں ملوث عناصر کو فوری گرفتار کرکے عبرتناک سزا دی جائے۔دریں اثناء محمد عابد کو منگل کے روز بعد نماز ظہر سوسائٹی قبرستان طارق میں سپرد خاک کردیا گیا ۔ محمد عابد کی نماز جنازہ بلال مسجد ناظم آباد میں ادا کی گئی ۔ نماز جنازہ و تدفین میں ایم کیو ایم رابطہ کمیٹی کے رکن محمد سلیم صدیقی ، کراچی تنظیمی کمیٹی کے اراکین ، ایم کیو ایم کے علاقائی سیکٹر یو نٹس کمیٹی کے ارکان و کارکنان اور شہید کے عزیزواقارب نے شرکت کی ۔