الطاف حسین ملک میں ایسے معاشرے کے قیام کے خواہشمند ہیں جہاں ہر انسان کو برابری اور احترام کا درجہ حاصل ہو، ارکان رابطہ کمیٹی

کراچی ۔۔۔19جولائی2014ء

متحدہ قومی موومنٹ کے زیر اہتمام مختلف علاقوں میں افطار ڈنر کے سلسلے کو جاری رکھتے ہوئے گزشتہ روز فیڈرل بی ایریا اور اسکیم 33میں الگ الگ افطار و ڈنر کا انعقاد کیا گیا جس میں ایم کیو ایم رابطہ کمیٹی کے ارکان سید امین الحق او ر سیف یار خان نے شرکت کی ۔ اس موقع پر حق پرست رکن قومی اسمبلی مزمل قریشی ،شیخ صلاح الدین ،صوبائی مشیر سید فیصل علی سبزواری ،اراکین صوبائی اسمبلی سندھ عبداللہ ، خالد بن ولایت ،افتخار عالم ، معروف قوال و نعت خواں امجد صابری سمیت حق پرست خواتین ، بچوں ، نوجوانوں ، بزرگوں کی بڑی تعداد موجود تھی ۔ افطار ڈنر کے شرکا ء سے گفتگو کرتے ہوئے رابطہ کمیٹی کے ارکان سید امین الحق اور سیف یار خان نے کہا کہ ایم کیو ایم جناب الطا ف حسین کی تعلیمات پر عمل کرتے ہوئے ہم وطنوں کی بلا امتیاز رنگ ، نسل ، مذہب ، زبان اور علاقہ خدمت کر رہی ہے اور یہی وجہ ہے کہ آج کراچی اور اندرون سندھ سمیت کشمیر اور گلگت بلتستان تک مظلوم و محروم عوام ایم کیو ایم کا حصہ بن رہے ہیں اور پاکستان سے فرسودہ و کرپٹ سیاسی نظام کے خاتمے کی جدو جہد کر رہے ہیں ۔ رابطہ کمیٹی کے ارکان نے کہا کہ جس دن ملک کے غریب و محروم عوام ایک پلیٹ فارم پر یکجا ہو گئے اُس روز ملک میں حقیقی انقلاب برپا ہوجائے گا اور پاکستان حقیقتاً قائد اعظم محمد علی جناح ؒ کا پاکستان بن کر اُبھرے گا۔اراکین رابطہ کمیٹی نے کہا کہ جناب الطاف حسین ملک میں غریب عوام کی حکمرانی چاہتے ہیں اور ایسے معاشرے کے قیام کے خواہشمند ہیں جہاں ہر انسان کو برابری اور احترام کا درجہ حاصل ہو ۔ اراکین رابطہ کمیٹی نے بڑی تعداد میں افطار ڈنر میں شرکت کرنے پر حق پرست عوام ، میڈیا نمائندگان ، فنکاروں اور تمام تر شعبہ ہائے زندگی سے تعلق رکھنے والی شخصیات کا شکریہ ادا کیا اور شرکاء سے اپیل کی کہ وہ شمالی وزیرستان کے متاثرین اور کے کے ایف کے تحت رمضان المبارک میں مستحقین کی امداد کیلئے زکوٰۃ ، فطرہ ، صدقات اور دیگر عطیات ایم کیوایم کے فلاحی ادارے خدمت خلق فاؤنڈیشن کو دیں اور دکھی انسانیت کی خدمت کے میں عملی طور پر بڑ ھ چڑھ کر حصہ لیں۔