معصوم بے گناہ فلسطینی عورتوں، بچوں، نوجوانوں اور عوام کا قتل عام بند کروائیں، ایم کیوایم کے قائد الطاف حسین کا اقوام متحدہ کے سیکریٹری جنرل بان کی مون کے نام ایس او ایس خط

لندن۔۔۔11 جولائی 2014ء

متحدہ قومی موومنٹ کے قائدجناب الطاف حسین نے اقوام متحدہ کے سیکریٹری جنرل بان کی مون کے نام ایک ایس او ایس SOS خط تحریر کیاہے جس میں ان سے دردمندانہ اپیل کی ہے کہ وہ معصوم بے گناہ فلسطینی عورتوں ، بچوں، نوجوانوں اورعوام کاقتل عام بندکروائیں اوربین الاقوامی اصولوں کے تحت اسرائیل کوپابندکریں کہ وہ ہوائی جہازوں،ٹینکوں اوردیگرمہلک ہتھیاروں کے ذریعے فلسطینی علاقوں میں میزائلوں اور دیگرمہلک بموں کی بارش کوفی الفوررکوائیں تاکہ فلسطینی عوام شہید ہونے والوں کی تدفین ،زخمیوں کی خبرگیری اوربے گھرہوجانے والے افراد کی دیکھ بھال کرسکیں اور انہیں ضروری امدادفراہم کرسکیں۔

دریں اثناء جناب الطاف حسین نے اپنے ایک بیان میں انسانی حقوق کے علمبردارتمام اسلامی وغیراسلامی ممالک سے انسانیت کے نام پر اپیل کی ہے کہ وہ فلسطینی علاقوں پر اسرائیلی جارحیت کے خلاف بھرپور اندازمیں آوازاحتجاج بلندکریں اور تمام سفارتی ذرائع استعمال کرتے ہوئے اسرائیلی حکام کوقائل کریں کہ وہ شکایات اورمسائل کے حل کے لئے بات چیت کاذریعہ اپنائیں نہ کہ کسی قسم شکایت کاجواب بمباری اور گولہ بارود سے دیاجائے جس کاخمیازہ معصوم وبے گناہ فلسطینیوں کوبھگتناپڑے۔ جناب الطا ف حسین نے اسرائیل کی بمباری کے نتیجے میں بڑے پیمانے پر فلسطینیوں کی شہادت پردلی صدمہ اورافسوس کااظہارکیا اور شہیدوں کے لواحقین ، زخمیوں اور بے گھرہونے والے فلسطینی عوام سے دلی ہمدردی کااظہارکیا اوراللہ تعالیٰ کے حضور دعاکی کہ اللہ تعالیٰ فلسطینی عوام کوہرقسم کی مشکلات سے نجات دلائے اوران کے تمام دیرینہ جائزمطالبات کوپورافرمائے۔