ایم کیو ایم رابطہ کمیٹی کے رکن حیدر عباس رضوی کی گلگت بلتستا ن میں گندم ، تیل اور چینی پر سبسڈی واپس لینے کے اقدام کی مذمت

کراچی ۔۔۔14اپریل 2014ء

متحدہ قومی موومنٹ کی رابطہ کمیٹی کے رکن سید حیدر عباس رضوی نے گلگت بلتستا ن میں وفاقی حکومت کی جانب سے گندم،تیل اور چینی پر سبسڈی واپس لینے کے اقدام کی مذمت کی ہے ۔ ایک مذمتی بیان میں انہوں نے کہا کہ وفاقی حکومت کے اس ظالمانہ ا قدام کے باعث گلگت بلتستان کے عوام میں شدید بے چینی اور اضطراب پایا جارہا ہے ۔انھوں نے گلگت بلتستان کی عوام سے اظہار ہمدردی کرتے ہوئے کہا کہ ایم کیو ایم حکومت کے اس غیر منصفانہ اقدام کی مخالفت کرتی ہے اور اس سلسلے میں گلگت کی عوام کے ساتھ ہے ۔ انھوں نے کہا کہ ایم کیوایم گلگت بلتستان میں چینی اور گندم کی سبسڈی واپس لینے کے خلاف 15اپریل کو ہونے والے عوامی احتجاج کی مکمل حمایت کرتی ہے اور ایم کیو ایم اس احتجاج میں بھر پور انداز میں شرکت کریگی ۔ حیدر عباس رضوی نے وزیر اعظم پاکستان میاں محمد نواز شریف اور وفاقی وزیر برائے کشمیر افےئرز اور گلگت بلتستان چوہدری محمد برجیس طاہر سے مطالبہ کیا ہے کہ وہ وفاقی حکومت کی جانب سے سبسڈی واپس لینے کے اقدام کو فی الفور واپس لیں اور گند م، تیل اور چینی پر سبسڈی فوری بحال کرکے گلگت بلتستان کے عوام کو خصوصی مراعات فراہم کریں ۔