قائد تحریک الطاف حسین کی رہائش گاہ پر ایک مرتبہ پھر مشکوک سرگرمیوں پر رابطہ کمیٹی کا اظہارمذمت

لندن ۔۔۔25، دسمبر2019ئ

متحدہ قومی موومنٹ کی رابطہ کمیٹی نے بانی وقائد تحریک جناب الطاف حسین کی رہائش گاہ پر ایک مرتبہ پھر مشکوک سرگرمیوں کی سخت ترین الفاظ میں مذمت کی ہے ۔ ایک بیان میں رابطہ کمیٹی نے کہاکہ آج بروز بدھ مورخہ 25، دسمبر2019ء سہ پہر کے وقت ایک مشکوک کار میں سوار دہشت گرد قائد تحریک جناب الطاف حسین کی رہائش گاہ پہنچے ، ایک دہشت گرد نے کار سے اتر کر جناب الطاف حسین کے گھر اور باہر پارک کی گئی گاڑیوںکی تصاویر بنانی شروع کردیں۔ جب وہاں موجود رضا کار ، ان دہشت گردوںکو دیکھتے ہی باہر نکلے تو دہشت گرد کار میں بیٹھ کر فرار ہوگئے ۔ رابطہ کمیٹی نے کہاکہ اس واقعہ سے پولیس کو مطلع کردیاگیا ہے ۔ رابطہ کمیٹی نے کہاکہ ہم ، دہشت گردوں اور ان کے سرپرستوں کو بتادینا چاہتے ہیں کہ اس قسم کے اوچھے ہتھکنڈوں سے ہمیں نہ پہلے خوف زدہ کیاجاسکا ہے اور نہ ہی آئندہ خوف زدہ کیاجاسکتا ہے ۔ رابطہ کمیٹی نے کہاکہ دشمن عناصر ،قائد تحریک جناب الطاف حسین کے سچائی پر مبنی خطابات سے شدید پریشانی اوربوکھلاہٹ کا شکار ہیں اور اسی بوکھلاہٹ میں اوچھے ہتھکنڈے استعمال کررہے ہیں۔ رابطہ کمیٹی نے تمام وفاپرست ماؤں، بہنوں، بزرگوں اورنوجوانوں سے اپیل کی کہ وہ قائد تحریک جناب الطاف حسین کی صحت وتندرستی ،عافیت وسلامتی اور درازی عمر کیلئے خصوصی دعائیں کریں۔

٭٭٭٭٭