ایم کیو ایم کی سابق رکن اسمبلی اور سینئرکا رکن محترمہ عزیز قزلباش کے انتقال پر بانی و قائد الطاف حسین کا اظہارتعزیت

لندن ۔۔۔ 3دسمبر 2018ء

ایم کیو ایم کے بانی و قائد جناب الطاف حسین نے ایم کیو ایم کی سابق رکن اسمبلی اور شعبہ خواتین کی سینئر رکن محترمہ عزیز قزلباش کے انتقال پر شدید رنج و غم کا اظہارکیاہے ۔اپنے تعزیتی بیان میں جناب الطاف حسین نے کہاکہ محترمہ عزیزقزلباش ایم کیوایم کی سینئرکارکن تھیں، جنہوں نے ہردورمیں تحریک کاساتھ دیا ، ریاستی آپریشن کے دوران نائن زیروپر خدمات انجام دیں، حالیہ بدترین ریاستی آپریشن میں بھی وہ اپنی ضعیف العمری اور علالت کے باوجود آزمائش کے وقت میں اپنی وفا پر قائم رہیں اورتحریک کے لئے خدمات انجام دیتی رہیں۔محترمہ عزیز قزلباش کی وفا پرستی تحریک کی دیگر کارکنوں کے لئے ایک مثال ہے۔ جناب الطاف حسین نے کہاکہ محترمہ عزیز قزلباش کے انتقال سے تحریک ایک مخلص، سچی اور وفا شعار کارکن سے محروم ہوگئی ہے۔جناب الطاف حسین نے مرحومہ کی صاحبزادی اورتحریک کی کارکن شرمین قزلباش سے فون پر تعزیت کرتے ہوئے کہاکہ آپ کی والدہ کڑے سے کڑے وقت میں بھی ثابت قدم رہیں اورتحریک سے جڑی رہیں،ایم کیو ایم کی جدوجہد میں محترمہ عزیز قزلباش کی خدمات یاد رکھی جائیں گی، ان کے انتقال سے ہم سب اداس ہیں، ان کاخلاء پر کرنا مشکل ہوگا۔جناب الطاف حسین نے کہاکہ محترمہ عزیز قزلباش کے انتقال پر میں، رابطہ کمیٹی، CEC اور سیکریٹریٹ کے ارکان تمام سوگوار اہل خانہ کے غم میں برابرکے شریک ہیں۔ انہوں نے دعاکی کہ اللہ تعالی مرحومہ عزیز قزلباش کی مغفرت فرمائے، ان کے درجات بلند فرمائے اور معصومین کربلا کے صدقے انہیں جنت الفردوس میں جگہ عطا فرمائے۔ آمین

*****