ایم کیوایم کے قائد الطاف حسین کراچی میں تجاوزات کے خاتمہ کے نام پرشہریوں کے معاشی قتل عام کے خلاف کل بروز جمعہ اہم خطاب کریں گے

لندن ۔۔۔ 29 نومبر 2018ء

متحدہ قومی موومنٹ کے بانی وقائدجناب الطاف حسین کراچی میں تجاوزات کے خاتمہ کے نام پر غریب عوام کے معاشی قتل عام اورناانصافیوں کے خلاف کل بروز جمعہ مورخہ 30نومبر کواہم خطاب کریں گے ۔ جناب الطاف حسین کایہ خطاب پاکستان وقت رات 9بجے اورلندن کے مقامی وقت کے مطابق شام 4 بجے ہوگا۔ خطاب سوشل میڈیاکے ذریعے براہ راست نشر کیاجائے گا۔ دریں اثناء ایم کیوایم کی رابطہ کمیٹی نے اپنے بیان میں کہاکہ سپریم کورٹ کے احکامات پر سندھ کے شہری علاقوں خصوصاً کراچی میں تجاوزات کے خاتمے کی آڑ میں غریب ومتوسط طبقہ کے عوام کامعاشی قتل کیاجارہاہے،تجاوزات کی آڑ میں کراچی کے شہریوں کی 40، 40، سال ، 60، 60سال سے قائم قانونی دکانوں کوبھی بیدری سے مسمارکرکے ان کاکاروبار تباہ کیاجارہاہے ،غریب ومتوسط طبقہ کے دکانداروں کے ساتھ ساتھ غریب پتھاریداروں اورمحنت کشوں کومتبادل فراہم کئے بغیران کے روزگارچھینے جارہے ہیں اوراس طرح لاکھوں گھروں کے چولہے ٹھنڈے کئے جارہے ہیں اورانہیں فاقہ کشی پر مجبور کیاجا رہا ہے ۔ رابطہ کمیٹی نے کہاکہ کراچی میں غریب ومتوسط طبقہ کی دکانوں اورمکانوں کو مسمارکرکے ان پر جوظلم کیا جارہا ہے ، جس طرح ان کامعاشی قتل کیا جارہا ہے، اس پر قائدتحریک الطاف حسین انتہائی دکھی اورغمزدہ ہیں اوروہ عوام کے معاشی قتل پر سیاسی ومذہبی جماعتوں کی مجرمانہ خاموشی اوربے حسی پر بھی بہت افسردہ ہیں۔ قائدتحریک الطاف حسین کل بروزجمعہ اس خالصتاًانسانی مسئلے پر اہم خطاب کریں گے ۔ رابطہ کمیٹی نے کہا کہ عمران خان کی حکومت نے عوام کو 50لاکھ گھربناکردینے کا اعلان کیاتھالیکن عمران خان کی حکومت عوام کوگھرتوکیادیتی وہ کراچی میں عوام کے بنے بنائے گھروں کومسمار کرکے ان کے سروں سے چھت چھین رہی ہے ۔ رابطہ کمیٹی نے مطالبہ کیاکہ دکانداروں کومتبادل فراہم کیاجائے اوراس طرح تجاوزات کے خاتمے کے نام پرکراچی کے شہریوں کامعاشی قتل بند کیاجائے۔ رابطہ کمیٹی نے کہاکہ قائدتحریک الطاف حسین کومظلوم دکانداروں اور شہریوں سے مکمل ہمدردی ہے اوروہ انصاف کے حصول میں انکے ساتھ ہیں۔ 

*****