ہمیں ایسے ظالمانہ نظام سے آزادی چاہیے جہاں انصاف نہ ہو۔الطا ف حسین

لندن ۔۔۔ 18ستمبر 2018ء

ایم کیوایم کے بانی وقائد جناب الطاف حسین نے کہاہے کہ جس ملک میں انصاف نہ ہواورایسانظام ہوکہ غریب اپنے علاج کے لئے دوائیوں سے محروم ہوں اوردولتمندعیش کررہے ہوں،ہمیں ایسے ظالمانہ نظام سے آزادی چاہیے ۔ انہوں نے یہ بات پیر کی شب انٹرنیشنل سیکریٹریٹ میں تجدیدعہدوفا کی تقریب سے خطاب کرتے ہوئے کہی۔ گزشتہ روز 17، ستمبر تھی اور جناب الطاف حسین کی 65 ویں سالگر ہ تھی لیکن عاشورہ محرم کے تقدس اور احترام میں جناب الطاف حسین کی سالگرہ کی تقریبات مؤخر کردی گئی تھیں تاہم پاکستان سمیت دنیا بھر میں جناب الطاف حسین کے یوم پیدائش کو ’’ تجدید عہدوفا‘‘ کے طورپر منایا گیا۔ اس سلسلے میں انٹرنیشنل سیکریٹریٹ میں بھی تجدیدعہدوفاکی تقریب ہوئی جس میں اراکین رابطہ کمیٹی، ایم کیوایم یوکے یونٹ کے ذمہ داروں، کارکنوں اوران کے اہل خانہ نے بڑی تعدادمیں شرکت کی ۔علاوہ ازیں امریکہ ، کینیڈا، آسٹریلیا ،ساؤتھ افریقہ اوربریڈفورڈ اوورسیزیونٹوں اورپاکستان اوردیگرممالک میں مقیم کارکنوں نے ٹیلیفون کے ذریعے اس تقریب میں شرکت کی ۔ تقریب میں شہید انقلاب ڈاکٹرعمران فاروق کی بیوہ شمائلہ عمران اوران کے بچوں نے بھی شرکت کی ۔جناب الطا ف حسین نے محرم الحرام کے تقدس میں شہدائے کربلااورتحریک کے تمام شہداکے ایصال ثواب کے لئے قرآنی آیات کی تلاوت کی ، دعائیں کیں اورمختصر خطاب کیا۔ جناب الطا ف حسین نے شہیدانقلاب ڈاکٹرعمران فاروق، شہیدوفاڈاکٹرحسن ظفر عارف سمیت ایم کیوایم کے تمام شہیدوں کے ساتھ ساتھ بلوچ، پشتون اورسچے قوم پرست سندھی شہیدوں کوخراج عقیدت پیش کیااوران کے درجات کی بلندی کیلئے دعاکی ۔ انہوں نے ڈاکٹرعمران فاروق شہید کی اہلیہ شمائلہ عمران کی صحتیابی اوران کے بچوں کے بہتر مستبقل کے لئے بھی دعاکی ۔ جناب الطا ف حسین نے تمام کارکنوں ، ماؤں، بہنوں،نوجوانوں اوربزرگوں کوتجدیدعہد وفاکی مبارکباد دی اورکہاکہ اللہ تعالیٰ آپ سب کواپنے عہدپرقائم رہنے کی طاقت، ہمت اورتوفیقعطا فرمائے ۔

اس موقع پر اظہارخیال کرتے ہوئے ڈپٹی کنوینرقاسم علی رضانے کہاکہ تحریک کے کارکنان ہرسال نائن زیروپرجمع ہوکراپنے قائدسے تجدید عہدوفاکرتے تھے لیکن ہمارے دشمنوں نے نائن زیروپرتالہ ڈال کراور ریاستی جبر اورمظالم کے ذریعے ہماری ان خوشیوں کوچھین لیا۔ انہوں نے کہاکہ یہ ریاستی مظالم بھی قائدتحریک الطاف حسین کے چاہنے والوں کواپنے قائدسے تجدیدعہدوفاکرنے سے نہیں روک سکے اور آج کراچی ہی نہیں پاکستان کے مختلف شہروں اور دنیا بھر میں موجود ایم کیوایم کے کارکنان نے قائدتحریک جناب الطاف حسین سے اپنے عہدوفاکی تجدید کی۔انہوں نے کہاکہ قائدتحریک الطا ف حسین کی محبت کارکنان وعوام کے دلوں میں موجود ہے جسے ظلم وجبر کے ذریعے ختم نہیں کیاجاسکتا۔تقریب کی نظامت کے فرائض ایم کیوایم یوکے کے آرگنائزر ہاشم اعظم نے انجام دیے۔ تجدید عہدوفا کی تقریب میں جناب الطاف حسین کی سالگرہ کاکیک بھی کاٹاگیا، تقریب کی کارروائی سوشل میڈیا کے ذریعہ براہ راست نشر کی گئی۔

*****