بیرسٹرہارون بلور اوردیگرافرادکی شہادت ملک کاایک بڑاسانحہ ہے ۔الطاف حسین

لندن ۔۔۔ 10 جولائی 2018ء

متحدہ قومی موومنٹ کے بانی وقائدجناب الطاف حسین نے پشاورمیں ایک خودکش دھماکے میں عوامی نیشنل پارٹی کے شہید رہنمابشیربلورکے صاحبزادے اور انتخابی امیدواربیرسٹرہارون بلور اوردیگرافرادکی شہادت پر دلی افسوس کااظہار کیاہے اوراس واقعہ کوملک کاایک بڑاسانحہ قراردیاہے ۔ اپنے ایک مذمتی بیان میں جناب الطا ف حسین نے کہاکہ 2013ء کے انتخابات کے موقع پر اے این پی کے رہنمابشیربلور کوبھی اسی طرح کے ایک خودکش دھماکے میں شہید کردیا گیا تھا اوراب بشیربلور کے صاحبزادے ہارون بلور کوبھی خودکش دھماکے میں شہید کردیاگیاہے ، یہ واقعہ ہے نہ صرف بلورفیملی اور اے این پی کے رہنماؤں و کارکنوں کے لئے صدمہ کا باعث ہے بلکہ اس نے پورے ملک کے عوام کوغم اورصدمے میں مبتلاکردیاہے۔جناب الطا ف حسین نے کہاکہ اس خودکش بم دھماکے نے حکومت اورفوج کے حکام کی جانب سے کئے جانے والے امن و استحکام اورپرامن انتخابات کے دعووں کی حقیقت کھول کررکھ دی ہے ۔جناب الطا ف حسین نے ہارون بلور اوردرجنوں افراد کی شہادت پربلور فیملی کے تمام افراداوراے این پی کے رہنماؤں اورکارکنوں سے تعزیت کااظہارکرتے ہوئے کہاکہ اس سانحہ پر میں اورایم کیوایم کے تمام کارکنان حاجی غلام احمدبلور، الیاس بلوراوربلورفیملی کے تمام افراداوراے این پی کے رہنماؤں،کارکنوں اور سانحہ کے تمام شہیدوں کے اہل خانہ کے غم میں برابرکے شریک ہیں۔ انہوں نے دعاکی کہ اللہ تعالیٰ ہارون بلورشہیداوردھماکے کے تمام شہیدوں کی مغفرت فرمائے، انہیں جنت الفردوس میں جگہ دے ، ان کے لواحقین کویہ صدمہ برداشت کرنے کاحوصلہ عطاکرے۔ انہوں نے زخمیوں کی جلدصحتیابی کے لئے بھی دعا کی ۔ 

*****