اسپیکر سندھ اسمبلی آغا سراج درانی کا مہاجروں کے سیاسی ، معاشی ، سماجی ، تعلیمی ، جسمانی قتل عام ،چھاپوں ، گرفتاریوں اور انسانی حقوق کی سنگین خلاف ورزیوں کے خلاف ایم کیوایم کے کراچی پریس کلب کے باہر لگائے گئے’’تادمِ مرگ بھوک ہڑتالی ‘ کیمپ کاچوتھے دن دورہ

کراچی ۔۔۔20، اگست2016ء 

اسپیکر سندھ اسمبلی آغا سراج درانی نے مہاجروں کے سیاسی ، معاشی ، سماجی ، تعلیمی ، جسمانی قتل عام ، کارکنان کے گھروں و دفاتر پر غیر آئینی و غیر قانونی چھاپوں ، گرفتاریوں اور انسانی حقوق کی سنگین خلاف ورزیوں کے خلاف متحدہ قومی موومنٹ کی کراچی پریس کلب کے باہر ’’تادمِ مرگ بھوک ہڑتال ‘کے کیمپ کاچوتھے دن دورہ کیا اورتادم مرگ بھوک ہڑتال پر بیٹھے ہوئے ایم کیوایم کے ذمہ داران وکارکنان سے کی خیریت دریافت کی اور ان سے فرداً فرداً ہاتھ بھی ملایا ۔ آغا سراج درانی بھوک ہڑتالی کیمپ کے چوتھے روز دوپہر 2بجے اظہار یکجہتی کیلئے پہنچے تو ایم کیوایم کی رابطہ کمیٹی کے ڈپٹی کنوینر کنور نوید جمیل اور رابطہ کمیٹی کے اراکین نے انہیں خوش آمدید کہا ۔ آغا سراج درانی نے بھوک ہڑتالی کیمپ کے شرکاء سے خطاب کرتے ہوئے کہاکہ مجھے تادم مرگ بھوک ہڑتال کا معلوم ہوا تھا میں اسلام آباد میں ایک کانفرنس میں شریک تھا اور آج ہی پہنچا ہوں ۔ انہوں نے کہاکہ میرے ذریعے کوئی ایشو حل ہوسکتا ہے تو میں حاضر ہوں کیونکہ اسپیکر کا کام حکومت اور اپوزیشن کو ساتھ لیکر چلنا ہی ہوتا ہے ، میں ایم کیوایم کے مسائل کے حل کیلئے حکومت ، نئے زیراعلیٰ سندھ مراد علی شاہ سے بھیؓ بات کروں گا اور اگر کسی اور سے بھی مسائل کے حل کیلئے بات کرنا پڑی تو ضرور کروں گا ۔ انہوں نے کہاکہ ایم کیوایم ہمارا حصہ ہے ، میری کوشش ہوگی کہ ایم کیوایم کے لوگوں کے مسائل جلد از جلد حل ہوں ۔