حکومت سندھ کی جانب سے رینجرز کو صرف کراچی کیلئے اختیارات دینا کھلی کراچی دشمنی ہے۔ ندیم نصرت

لندن ۔۔۔ یکم اگست 2016ء

متحدہ قومی موومنٹ کے کنوینرندیم نصرت نے حکومت سندھ کی جانب سے رینجرزکوصرف کراچی کیلئے اختیارات دینے کی شدیدمذمت کی ہے اوراسے کھلی کراچی دشمنی قراردیاہے ۔ اپنے ایک بیان میں ندیم نصرت نے کہاکہ اگرحکومت سندھ واقعی قیام امن اوردہشت گردی کاخاتمہ چاہتی ہے اوراس مقصد کیلئے رینجرزسے ہی کارروائی کرواناچاہتی ہے توپھررینجرزپرحملے ، بموں کے دھماکے،دہشت گردی ،اغوا برائے تاوان اورجرائم کے واقعات کیااندرون سندھ میں نہیں ہورہے ہیں؟ پھررینجرز کو کارروائی کا اختیار پورے سندھ کیلئے کیوں نہیں دیا جارہا ہے ؟ رینجرزکوکارروائی کااختیارصرف کراچی کیلئے کیوں دیاگیاہے؟ کیا حکومت سندھ کا یہ فیصلہ کھلی کراچی دشمنی نہیں؟ ندیم نصرت نے کہا کہ حکومت سندھ کے فیصلے اس کی روایتی کراچی دشمن پالیسیوں کامنہ بولتاثبوت ہیں اور آج بھی وہ اپنی اسی پالیسی پر گامزن ہے کہ ایم کیوایم کے خلاف ریاستی آپریشن جاری رکھاجائے ، کراچی والوں کوکچلاجائے اورکراچی کے علاقوں اورکراچی کے شہریوں کو ریاستی مظالم کانشانہ بنایاجائے ۔اپنے اس فیصلے کے ذریعے حکومت سندھ نہ صرف پاکستان بلکہ پوری دنیاکویہ پیغام دے رہی ہے کہ کراچی سندھ کاحصہ نہیں ہے ۔ ندیم نصرت نے کہاکہ اگرحکومت سندھ رینجرزسے کام لیناچاہتی ہے توپورے سندھ میں لیا جائے ورنہ صرف کراچی میں کارروائی کااختیارسراسرزیادتی ہے اورکراچی کے شہری اس کھلی زیادتی کوقبول نہیں کریں گے۔