قائدتحریک الطاف حسین رواں سال اکتوبرمیں امریکہ کا دورہ کریں گے ،متین یوسف

قائدتحریک الطاف حسین رواں سال اکتوبرمیں امریکہ کا دورہ کریں گے ،متین یوسف
امریکہ میں ایم کیوایم کے 20 ویں سالانہ کنونشن کی افتتاحی تقریب میں مرکزی آرگنائزر متین یوسف کا اعلان
الطاف حسین کو بین الاقوامی این جی اوز کی جانب سے امریکہ کے دورے، تعلیمی اداروں کے طلباء کی جانب سےلیکچرز اورایم کیوایم کے کارکنان کی جانب سے امریکہ کے دورے کی دعوت دی گئی تھی، متین یوسف
قائد تحریک الطاف حسین نے امریکہ کے دورے کی دعوت قبول کرلی ہے، متین یوسف
ایم کیوایم، امریکہ کی مختلف ریاستوں کے ذمہ داران ، کارکنان اور ہمدرد پاکستانیوں میں خوشی کی لہر
تقریب کے شرکاء کا فلک شگاف نعرے لگاکر الطاف حسین سے والہانہ عقیدت ومحبت کا اظہار 
واشنگٹن ڈی سی ۔۔۔23، جولائی2016ء
ایم کیوایم اوورسیز امریکہ کے مرکزی آرگنائزر متین یوسف نے اعلان کیاہے کہ قائد تحریک جناب الطاف حسین نے بین الاقوامی این جی اوز کے نمائندوں، تعلیمی اداروں کے طلباوطالبات اورکارکنان کی جانب سے امریکہ کے دورے کی دعوت قبول کرتے ہوئے رواں سال اکتوبرکے مہینے میں امریکہ کے دورے کی حامی بھرلی ہے ۔یہ اعلان انہوں نے امریکہ میں ایم کیوایم کے 20 ویں سالانہ کنونشن کی افتتاحی تقریب سے خطاب کرتے ہوئے کیا۔ تقریب میں ایم کیوایم کی رابطہ کمیٹی کے کنوینر ندیم نصرت، سینئر ڈپٹی کنوینر ڈاکٹرفاروق ستار، سابق سینیٹر بابر خان غوری، امریکہ کی مختلف ریاستوں سے تعلق رکھنے والے ایم کیوایم کے ذمہ داران ، کارکنان اور امریکہ میں مقیم پاکستانیوں نے بڑی تعداد میں شرکت کی ۔ جناب الطاف حسین کی جانب سے امریکہ کے دورے کی دعوت قبول کرنے کی خبر سے تقریب کے شرکاء میں خوشی کی لہر دوڑ گئی ہے اورشرکاء نے جناب الطاف حسین اور ایم کیوایم کے حق میں فلک شگاف نعرے لگاکر جناب الطاف حسین سے اپنی والہانہ عقیدت ومحبت کا اظہار کیا۔
اپنے خطاب میں متین یوسف نے کہاکہ قائد تحریک جناب الطاف حسین کو امریکہ کی مختلف ریاستوں میں کام کرنے والی بین الاقوامی این جی اوز کے نمائندوں کی جانب سے امریکہ کے دورے کی دعوت دی جارہی تھی ، اسی طرح امریکہ کے تعلیمی اداروں کے طلبا وطالبات کی جانب سے مختلف موضوعات پر لیکچرکی درخواست کی جارہی تھی جبکہ ایم کیوایم اوورسیز امریکہ کے مختلف یونٹوں کے ذمہ داران اورکارکنان کی جانب سے بھی جناب الطاف حسین کو امریکہ کے دورے کی دعوت دی جارہی تھی۔انہوں نے کہاکہ قائد تحریک جناب الطاف حسین نے بین الاقوامی این جی اوزکے نمائندوں، تعلیمی اداروں کے طلباوطالبات اورکارکنان کی جانب سے امریکہ کے دورے کی دعوت قبول کرلی ہے اور رواں سال اکتوبر میں امریکہ کادورہ کرنے کی حامی بھرلی ہے جس پر ایم کیوایم امریکہ کے کارکنان ان کا تہہ دل سے شکریہ ادا کرتے ہیں۔





تصاویر