جامعہ حقانیہ کو 30کروڑ ر وپے فراہم کرکے تحریک انصاف نے ایک بارپھرطالبان سے اپنے گہرےاوردیرینہ تعلقات کاعملی ثبوت فراہم کیاہے۔ندیم نصرت

لندن ۔۔۔ 27 جون 2016

متحدہ قومی موومنٹ کے کنوینرندیم نصرت نے تحریک انصاف کی خیبرپختونخوا حکومت کی جانب سے حالیہ بجٹ میں 30کروڑ روپے جامعہ حقانیہ کے لئے مختص کرنے پرتبصرہ کرتے ہوئے کہاہے کہ بجٹ عوام کے ٹیکسوں سے حاصل ہونے والی رقم پربنتاہے اورعوام کے ٹیکس کے پیسے عوام کی فلاح وبہبود اورتعمیر وترقی پر خرچ ہوناچاہیے لیکن خیبرپختونخوا کی حکومت نے عوام کے ٹیکسوں سے حاصل ہونے والی رقم میں سے 30کروڑ روپے جامعہ حقانیہ کے لئے مختص کئے ہیں جس کے بارے میں یہ حقیقت کسی سے ڈھکی چھپی نہیں ہے کہ اس مدرسہ سے طالبان نے جنم لیا جو آج پاکستان کے خلاف سرگرم ہیں اورجن کی وجہ سے آج پوری دنیا کی انگلیاں پاکستان پر اٹھ رہی ہیں ۔ ندیم نصرت نے کہاکہ اگرایک صوبائی حکومت ہی کسی ایسے مدرسے کی مالی مدد کرے گی توملک میں دہشت گردی کس طرح ختم ہوسکتی ہے ۔ انہوں نے ایک کہاکہ جامعہ حقانیہ کو 30کروڑ ر وپے فراہم کرکے عمران خان کی تحریک انصاف نے ایک بارپھرطالبان سے اپنے گہرے اوردیرینہ تعلقات کاعملی ثبوت فراہم کیاہے۔ندیم نصرت نے کہاکہ عمران خان اپنے فلاحی ادارے کے لئے تودنیابھرمیں جاکرفنڈجمع کرتے ہیں لیکن اپنی صوبائی حکومت سے ایک متنازعہ مدرسے کو30کروڑ روپے فراہم کرتے ہیں جوانتہائی افسوسناک ہے ۔