اگر مردم شماری صحیح اور شفاف ہوگئی تو 2018ء میں سندھ کا وزیراعلیٰ ایم کیوا یم کا ہوگا، ڈاکٹر محمد فاروق ستار، سینئر ڈپٹی کنوینر رابطہ کمیٹی
ہم دنیا کی تاریخ کا سب سے بڑا دھرنا دینے جارہے ہیں، یہ دھرنا تاریخی، پرامن اور سیاسی دھرنا ہوگا، ڈاکٹر فاروق ستار
اگر ہم کراچی کا مقدمہ لڑ رہے ہیں تو دراصل سندھ اور پاکستان کا مقدمہ لڑ رہے ہیں،، ڈاکٹر فاروق ستار
پاکستان کی سا لمیت اور بقاء ہمارا قومی ایجنڈا ہے ، ، ڈاکٹر فاروق ستار
PS-106 کے انتخابی مہم کے سلسلے میں ایم کیو ایم لیاقت آباد ٹاؤن سے نکالی گئی ریلی سے قبل میڈیا کے نمائندوں سے گفتگو
کراچی :31؍ مئی 2016ء
متحدہ قومی موومنٹ کی رابطہ کمیٹی کے سینئر ڈپٹی کنوینر ڈاکٹر محمد فاروق ستار نے کہا ہے کہا اگر مردم شماری صحیح اور شفاف ہوگئی تو سندھ2018ء میں سندھ کا وزیراعلیٰ ایم کیوا یم کا ہوگا ، آٹھ سال سے ملک میں مردم شماری نہیں ہوئی ہے، اس اہم مسئلے پر سپریم کورٹ کو فوری نوٹس لینا چاہئے اوروفاقی اور صوبائی حکومتوں کو پابند کرنا چاہئے کہ وہ جلد از جلد کراچی ، سندھ سمیت پورے ملک میں مردم شماری کرائیں ، مردم شماری سے نہ صرف سندھ بلکہ پورے ملک کے مسائل حل ہوں گے یہ انتخاب کی تیاری نہیں ایک عوامی تحریک قائم کرنے کی تیاری ہے ، اس بار سوسنار کی اور ایک لوہار کی ہوگی ۔ملک میں انتظامی بنیادوں پر 20صوبے بننے چاہئے ۔اب ہمیں فائنل راؤنڈ کھیلنا ہے اور ہم دنیا کی تاریخ کا سب سے بڑا دھرنا دینے جارہے ہیں ،یہ دھرنا ایک بڑا، تاریخی، پرامن اور سیاسی دھرنا ہوگا ، اس دھرنے سے لاڑکانہ ، خیرپور ، دادواور نوابشاہ کے ساتھ ساتھ کراچی اور حیدرآباد کا حل ہوگا ۔یہ ایک سیاسی جدوجہد ہے اگر ہماری سیاسی جدوجہد میں رکاوٹیں ڈالی گئیں تو یہ اچھی بات نہیں ہوگی ، ہمیں دیوار سے لگایا جارہا ہے، ہمیں حقوق دینے کے بجائے ہم پر ریاستی جبر کا قہر توڑا جارہا ہے ، چادر اور چاردیواری کا تقدس پامال کیا جارہا ہے اور یہ ناانصافی اور ظلم اچھا نہیں ہورہا ہے اس کے نتائج اچھے نہیں نکلیں گے۔اگر ہم کراچی کا مقدمہ لڑ رہے ہیں تو دراصل ہم پاکستان کا مقدمہ لڑ رہے ہیں ۔ پاکستان کی سالمیت اور بقاء ہمارا قومی ایجنڈا ہے۔ جو آج ہمیں وقت نہیں دے رہے ہیں کل وہ ہمارے گھر آکر ہمارے حقوق دے کر جائیں گے ۔ان خیالات کااظہارانہوں نے پی ایس 106کے ضمنی انتخاب کے سلسلے میں لیاقت آباد سے نکالی جانے منعقدہ ریلی سے قبل میڈیاکے نمائندوں سے گفتگو کرتے ہوئے کیا۔ اس موقع پرنامزدحق پرست امیدوار برائے پی ایس 106کے حق پرست امیدوار محفوظ یار خان ،رابطہ کمیٹی کے ارکان ، ارشد حسن ،عادل خان ،حق پرست رکن سندھ اسمبلی عظیم فاروقی ،سینٹرل ایگزیکٹوکونسل کے ارکان عوامی نمائندے،چیئرمین ووائس چیئرمین ،کونسلرز، ٹاؤن اوریوسی کے کارکنان اورحق پرست عوام کی بڑی تعدادموجودتھے ۔ڈاکٹر فاروق ستار نے کہا کہ کراچی کے بلدیاتی وسائل پر سندھ حکومت نے قبضہ کیا ہوا ہے ۔انہوں نے کہا کہ کراچی میں پانی اور بجلی کا مسئلہ سنگین صورت اختیار کرتا جارہا ہے ، کراچی کو کربلا بنایا جارہا ہے ، ایسا نہ ہو کہ پانی اور بجلی کے حوالے سے ہونے والے احتجاجی مظاہرے فسادات میں تبدیل ہوجائے اور شہر میں لاء اینڈ آرڈر کا مسئلہ پیدا ہو جائے اور جو صوبائی حکومت کنٹرول کرنے میں ناکام ہوجائے۔