بزرگ خواتین بہنوں بیٹیوں کیلئے اچھے رشتے تلاش کریں۔ الطاف حسین

لندن ۔۔۔ 29 مئی 2016ء

ایم کیوایم کے قائد جناب الطاف حسین نے اتوارکی شب لیاقت آباداورپی آئی بی کالونی میں ضمنی انتخابات کے سلسلے میں منعقدہ اجتماعات سے اپنے خطاب میں لڑکیوں کی شادی کے مسئلے پربھی بات کی ۔جناب الطاف حسین نے اجتماعات میں موجود بزرگ خواتین کومخاطب کرتے ہوئے کہا کہ یہ انتہائی افسوسناک صورتحال ہے کہ ہماری بہنیں اچھے رشتوں کے انتظارمیں گھروں میں بیٹھی ہیں۔میں چاہتا ہوں کہ میری ہر بہن اپنے گھرکی ہوجائے اورسب کے گھربس جائیں۔ انہوں نے بزرگ خواتین کومخاطب کرکے اعلان کیا کہ جومیری ایک بہن کی کسی اچھے گھر میں شادی کرائے گامیں انہیں اپنے ہاتھ سے تصویرپردستخط کرکے بھیجوں گا۔ انہوں نے کہاکہ اپنی بہنوں اوربیٹیوں کی شادیاں کراناہمارا فرض ہے ، اس سلسلے میں ہمیں ایک دوسرے کے ساتھ تعاون کرناچاہیے اورسیرت وکرداردیکھ کراپنی بہنوں بیٹیوں کاگھربساناچاہیے۔ جناب الطاف حسین نے نوجوانوں سے بھی اپیل کی کہ جونوجوان بغیرجہیز کے شادی کرے گامیں اسے بھی اپنافوٹودستخط کرکے انعام کے طورپربھیجوں گا۔ جناب الطاف حسین نے اس موقع پر دعابھی کی کہ اللہ تعالیٰ غیب سے تمام بہنوں بیٹیوں کے لئے اچھے رشتوں کابندوبست کرے اورسب کے گھربسائے ۔