وزارت داخلہ نے ’’مہاجر ری پبلکن آرمی ‘‘کا شوشہ چھوڑ کرسندھ کے شہری علاقوں کے عوام کی حب الوطنی کو ایک مرتبہ پھر مشکوک بنانے کی گھناؤنی کوشش کی ہے، زونل انچارجز و اراکین صوبہ سندھ

حیدرآباد۔۔۔2، ستمبر2013ء 

متحدہ قومی موومنٹ سانگھڑ ، ٹنڈو الہیار ، جام شورو ، بدین ، گھوٹکی اور دادو زون کے زونل انچارجز اور اراکین نے کہا ہے کہ وزارت داخلہ نے ’’مہاجر ری پبلکن آرمی ‘‘کا شوشہ چھوڑ کرسندھ کے شہری علاقوں کے عوام کی حب الوطنی کو ایک مرتبہ پھر مشکوک بنانے کی گھناؤنی کوشش کی ہے اور اس شوشے سے ان پر ریاستی مظالم ڈھانے کی بھیانک منصوبہ بندی کا بھانڈہ پھوٹ گیا ہے ۔ان خیالات کااظہار سانگھڑ زون کے زونل انچارج عارف شیخ و اراکین زونل کمیٹی نے پریس کلب ٹنڈو آدم ، ٹنڈو الہیار زون کے زونل انچارج محمد علی شاہ نے پریس کلب ٹنڈو الہیار ، جامشورو زون کے زونل انچارج محمد ایوب خان نے پریس کلب جامشورو ، بدین زون کے زونل انچارج عبدالقیوم چانگ و راکین زونل کمیٹی نے پریس کلب بدین ، گھوٹکی زون کے جوائنٹ زونل انچارج رانا محمد رمضان و اراکین زونل کمیٹی نے نیشنل پریس کلب گھوٹکی اور دادو زون کے جوائنٹ زونل انچارج اصغر علی سوڈرنے دادو زونل آفس پر مہاجر ری پبلکن آرمی کے شوشے کے خلاف منعقد کی گئی پریس کانفرنسوں سے اپنے خطاب میں کیا ۔ زونل انچارجز و اراکین نے پریس کانفرنسوں سے خطاب کرتے ہوئے کہا کہ سوچنے کی بات یہ ہے کہ ایک ایسے وقت میں جب وفاقی حکومت کراچی میں گینگ وار جرائم پیشہ بھتہ خور دہشت گردوں کے خلاف آپریشن کرکے شہر میں قیام امن کیلئے اقدامات کرنے جارہی ہے وزارت داخلہ کی جانب سے ’’مہاجر ری پبلکن آرمی ‘‘ کا شوشہ چھوڑ نا مہاجروں کے خلاف گہری سازش نہ سمجھا جائے تو پھر اسے کیا قرار دیاجائے ؟ انہوں نے کہاکہ مہاجر ری پبلکن آرمی کے شوشے کے پیچھے چھپی سازش کو ہر ذی شعور شخص بخوبی سمجھ سکتا ہے یہ شوشہ چھوڑ کر ماضی کے جناح پور کے شوشے کی طرح وزارت داخلہ نے ملک کو مزید شورش زدہ بنانے کا کام انجام دیا ہے ۔ انہوں نے کہاکہ اگر شہر میں مہاجر ری پبلکن آرمی کا وجود ہوتا تو اس سے وزارت داخلہ سے قبل شہر کے عوام آگاہ ہوتے اور یہ انتہائی حیرت اور تعجب خیز بات ہے ۔انہوں نے کہا کہ حب الوطنی کے جذبے سے سرشار بانیانِ پاکستان کی اولادوں کو جناح پور کے نقشے کے بے بنیاد اور جھوٹے الزام کے بعد اب مہاجر ری پبلکن آرمی کا شوشہ چھوڑ کر ایک بار پھرنت نئی سازش کی تیاری کی جارہی ہے ۔زوونل انچارج و اراکین نے کہاکہ قائد تحریک جناب الطاف حسین نے ہمیشہ صوبہ سندھ سمیت ملک کی تمام قومیتوں کو متحد ومنظم کرنے کی عملی جدوجہد کی ہے اور جناح پور کی طرح آج ایک مرتبہ پھر حق پرستی کے فلسفے سے خوفزدہ عناصر مہاجر ری پبلکن آرمی کا شوشہ چھوڑ کر ایک طبقہ آبادی کو نشانہ بنانے کی سوچ رہے ہیں تو وہ جان لیں کہ ملک بھر کے غریب ومتوسط طبقے کے عوام اب کسی بھی شوشے ، سازشوں اور ہتھکنڈوں کا شکار نہیں ہوں گے اور متحد ومنظم رہ کر تمام سازشوں کا سامنا کریں گے ۔انہوں نے کہاکہ ایم کیوایم کے ملک بھر میں موجود نظریاتی کارکنان اب تعصب اور نفرت کی سیاست کو مسترد کردیں گے اور مہاجر ری پبلکن آرمی کے شوشے کے پیچھے اگر کارفرما مذموم سازش پر عمل درآمد کیا گیا تو یہ عمل ملک کے موجودہ نازک ترین حالات میں خود کشی کے مترادف ہوگا ۔