کراچی میں شدید گرمی کے دوران مختلف حیلوں اور بہانوں سے بجلی کی طویل بندش پر رابطہ کمیٹی کااظہار مذمت

کراچی ۔۔۔4، مئی 2016ء 

متحدہ قومی موومنٹ کی رابطہ کمیٹی نے کراچی میں شدید گرمی کے دوران مختلف حیلوں اور بہانوں سے بجلی کی طویل بندش کی سخت مذمت کی ہے اور کہا ہے کہ ’’کے الیکٹرک‘‘ بجلی کی فراہمی کو یقینی بنانے کیلئے ضروری اقدامات کرے ۔ ایک بیان میں رابطہ کمیٹی نے کہا کہ ’’کے الیکٹرک ‘‘ کے ٹرانسمیشن اور ڈسٹری بیوشن کے نااہل افسران اور ڈپارٹمنٹس کے درمیان مضبوط رابطے نہ ہونے کی وجہ سے عوام ان کی نااہلی کی سزا بھگت رہے ہیں ۔ رابطہ کمیٹی نے کہاکہ ’’کے الیکٹرک ‘‘ کی انتظامیہ نااہل افسران کو برطرف کرکے میرٹ پر مقامی افراد کو تعینات کرے تاکہ عوام سکھ کا سانس لے سکیں ۔ رابطہ کمیٹی نے کہا کہ کراچی کے عوام ’’کے الیکٹرک‘‘ کے نااہل افسران کی وجہ سے دوہرے عذاب کا شکار ہیں ، ایک طرف تو بجلی کی آنکھ مچولی جاری ہے اور دوسری جانب نیپرا کے قوانین کی کھلی خلاف ورزی کرکے جعلی بل بنائے جارہے ہیں ۔ رابطہ کمیٹی وزیراعظم نواز شریف ، وفاقی وزیر پانی و بجلی اور وزیراعلیٰ سندھ سے مطالبہ کیا کہ کراچی میں ’’کے الیکٹرک ‘‘ کی من مانیوں کو روکاجائے اور عوام کو ریلیف فراہم کیاجائے ۔