ڈاکٹرفاروق ستار کے کوآرڈنیٹر آفتاب احمدکی رینجرزکی حراست کے دوران شہادت کا واقعہ کھلاظلم ہے ۔ندیم نصرت

لندن ۔۔۔ 3 مئی 2016ء

متحدہ قومی موومنٹ کی رابطہ کمیٹی کے کنوینرندیم نصرت نے ایم کیوایم کے کارکن اورسینئرڈپٹی کنوینرڈاکٹرفاروق ستار کے کوآرڈنیٹر آفتاب احمدکی رینجرزکی حراست کے دوران شہادت کے واقعہ کی شدیدمذمت کی ہے اوراسے ایک قتل قراردیاہے ۔ اپنے ایک بیان میں ندیم نصرت نے کہاکہ اس سے قبل بھی ایم کیوایم کے کئی کارکنوں کواسی طرح گرفتاری کے بعد دوران حراست تشددکانشانہ بناکرشہیدکردیاگیاتھالیکن آج تک ماورائے عدالت قتل کے کسی ایک بھی واقعہ میں ملوث سرکاری اہلکاروں کے خلاف کوئی کارروائی نہیں کی گئی۔ ندیم نصرت نے کہاکہ آفتاب احمدکوتین روزقبل رینجرزنے گھرسے گرفتارکیا،کل ریمانڈ لیا اورآج ان کی موت کی اطلاع دی جارہی ہے ۔ ندیم نصرت نے کہاکہ دوران حراست ہلاکت کایہ پہلا واقعہ نہیں ہے بلکہ ستمبر2013ء سے شروع کئے جانے والے آپریشن کے دوران اب تک ایم کیوایم کے 56 کارکنوں کو گرفتاری کے بعدسرکاری حراست میں بہیمانہ تشدد کرکے ماورائے عدالت قتل کیا جاچکا ہے۔ندیم نصرت نے کہاکہ ایم کیوایم کے خلاف جاری اس نئے آپریشن کے دوران ایم کیوایم کے 170 کارکنان تاحال لاپتہ ہیں جنہیں گرفتاری کے بعد سے اب تک کسی عدالت میں پیش نہیں کیاگیاجن میں میرپورخاص کی زونل کمیٹی کے رکن اورکونسلر فاروق جمیل درانی، سابقہ کراچی تنظیمی کمیٹی کے رکن عظیم احمد 

، لیبرڈویژن کے جوائنٹ آرگنائزرراشدعلی اوردیگر ذمہ داران شامل ہیں۔ آفتاب احمدکی دوران حراست شہادت کے واقعہ کے بعدایم کیوایم کے ان لاپتہ

کارکنان کی زندگیاں بھی شدید خطرے میں ہیں ۔ندیم نصرت نے کہاکہ آفتاب احمدکی دوران حراست شہادت کاواقعہ کھلاظلم ہے، یہی وجہ ہے کہ انسانیت پریقین رکھنے والا ہرفرد آج اس واقعہ کی کھل کرمذمت کررہاہے ۔ندیم نصرت نے سپریم کورٹ کے چیف جسٹس ،جناب جسٹس انورظہیرجمالی سے اپیل کی کہ اس واقعہ کاازخودنوٹس لیاجائے ۔انہوں نے صدرمملکت ممنون حسین ، وزیراعظم نوازشریف، وفاقی وزیرداخلہ چوہدری نثار، چیف آف آرمی اسٹاف جنرل راحیل شریف اور وزیراعلیٰ سندھ سیدقائم علی شاہ سے مطالبہ کیاکہ اس واقعہ کی اعلیٰ سطحی تحقیقات کرائی جائے اوراس کے ذمہ داراہلکاروں کے خلاف کارروائی کی جائے ۔ ندیم نصرت نے انسانیت پر یقین رکھنے والے تمام سیاسی رہنماؤں،انسانی حقوق کی تنظیموں، وکلاء، قلمکاروں، صحافیوں اورتجزیہ نگاروں سے بھی اپیل کی کہ وہ آفتاب احمدکے ماورائے عدالت قتل کے واقعہ پرآوازاحتجاج بلندکریں۔