رابطہ کمیٹی کے رکن سید امین الحق ، حق پرست میئر کراچی وسیم اختر اور نامزد چیئرمین ڈسٹرکٹ سینٹرل ریحان ہاشمی نے عبد الستار ایدھی کی عیادت کی

کراچی ۔۔۔2، مئی 2016ء 

متحدہ قومی موومنٹ کی رابطہ کمیٹی کے رکن سید امین الحق ، نامزد حق پرست میئر کراچی وسیم اختر اور نامزد حق پرست چیئرمین ڈسٹرکٹ سینٹرل ریحان ہاشمی نے معروف ملکی و بین الاقوامی سماجی رہنما عبد الستار ایدھی کی ان کی رہائشگا پر جاکر عیادت کی اور قائد تحریک جناب الطاف حسین کی جانب سے ان کی خیریت دریافت کی اور انہیں گلدستہ پیش کیا ۔ اس موقع پر عبد الستار ایدھی کے صاحبزادے فیصل ایدھی بھی موجود تھے ۔ ایم کیوایم کے وفد نے عبد الستار ایدھی کی علالت پر گہری تشویش کااظہار کیا اور ان کی جلد ومکمل صحت یابی کیلئے اللہ تعالیٰ کے حضور دعا بھی کی ۔ اس موقع پر میڈیا کے نمائندگان سے گفتگو کرتے ہوئے نامزد حق پرست میئر کراچی وسیم اختر نے کہاکہ عبد الستار ایدھی ملک و قوم کا اثاثہ ہیں اور ان کی سماجی و فلاحی خدمات کسی تعریف کی محتاج نہیں ہیں ۔انہوں نے قوم سے اپیل کی کہ وہ عبد الستار ایدھی کی جلد ومکمل صحت یابی کیلئے اللہ تعالیٰ کے حضور دعا کریں ۔اس موقع پر عبد الستار ایدھی نے میڈیا کے نمائندوں سے گفتگو کرتے ہوئے ایم کیوایم کے وفد کی آمد کا شکریہ ادا کیا اور وسیم اختر کو کراچی کا میئر نامزد ہونے پر دلی مبارکباد پیش کیا ۔ فیصل ایدھی نے حکومت سندھ سے مطالبہ کیا کہ کراچی کے عوام کا مینڈیٹ تسلیم کیاجائے اور مقامی حکومتوں کو مکمل اختیارات اور وسائل دیئے جائیں تاکہ کراچی کے عوام کے مسائل حل ہوسکیں ۔