اورنگی ٹاؤن میں پولیو ٹیموں پر دہشت گردوں کی فائرنگ اور متعدد پولیس اہلکاروں کی شہادت پر جناب الطاف حسین کا اظہار مذمت

لندن۔۔۔20اپریل 2016ء

متحدہ قومی موومنٹ کے قائد جناب الطاف حسین نے اورنگی ٹاؤن میں انسداد پولیو ٹیموں دہشت گردوں کے حملے کی شدید مذمت کی ہے اور فائرنگ کے نتیجے میں متعدد پولیس اہلکاروں کی شہادت پر گہرے دکھ اور رنج کا اظہار کیا ہے ۔ایک بیان میں جناب الطاف حسین نے کہا کہ عوام کی حفاظت پر مامور پولیس اہلکاروں پر حملے کا یہ واقعہ کھلی دہشت گردی اور بزدلانہ کاروائی ہے جسکی جتنی مذمت کی جائے وہ کم ہے ۔جناب الطاف حسین نے کہا کہ پولیو ٹیموں کی حفاظت کرنے والی ٹیموں کو ماضی میں بھی کالعدم تنظیموں کی جانب سے نشانہ بنایا جاتا رہا ہے اور میڈیا رپورٹس کے مطابق شہید ہونے والے اہلکار بھی پولیو ٹیموں کی حفاظت کیلئے علاقے میں موجود تھے جنہیں بیدردی سے فائرنگ کا نشانہ بنا کر شہید کردیا گیا ۔جناب الطاف حسین نے حکومت سے پرزور مطالبہ کیا کہ وہ دہشت گردی کے سفاکانہ واقعہ کا نوٹس لیکر قاتلوں کو فوری گرفتار کرے اور شہید اہلکاروں کے لواحقین کو نہ صرف معاوضہ دے بلکہ ان کے اہل خانہ کی کفالت کا بھی بندوبست کرے ۔ جناب الطاف حسین نے شہید اہلکاروں کے سوگوار لواحقین سے دلی تعزیت کااظہار کرتے ہوئے دعا کی کہ اللہ تعالیٰ ان شہیدوں کی مغفرت فرمائے اور لواحقین کو صبر جمیل عطا کرے ۔
English Viewers