کے ایم او سی ابراہیم حیدری سیکٹر کے کارکن محمد عامر عباسی کے قتل پر ایم کیو ایم رابطہ کمیٹی کی مذمت

کراچی۔۔۔27اگست2013ء

متحدہ قومی موومنٹ کی رابطہ کمیٹی نے دہشتگردوں کی فائرنگ سے شہید ہونے والے کراچی مضافاتی آرگنائزنگ کمیٹی ابراہیم حیدر ی سیکٹر یونٹ الیاس گوٹھ کے کارکن محمد عامر عباسی کے قتل کی سخت ترین الفاظ میں مذمت کی ہے اور واقعے کو کھلی دہشت گردی قرار دیا ہے۔اپنے مذمتی بیان میں رابطہ کمیٹی نے کہا کہ آئے دن کارکنان کی شہادت حکومتی مشینری کے لئے لمحہ فکریہ ہے، حکومت کا کام ہے کہ عوام کی جان و مال کاتحفظ فراہم کرے جس میں وہ ناکام ہوچکی ہے۔انہوں نے کہا کہ اگر حکومت اور قانون نافذ کرنے والے ادارے دہشت گردوں اور جرائم پیشہ عناصر کی سرپرستی کرتے رہیں گے تو حالات بہتر کون کرے گا؟۔رابطہ کمیٹی نے صدر مملکت جناب آصف علی زرداری ،وزیر اعظم میاں محمد نواز شریف ،وفاقی وزیر داخلہ چوہدری نثار علی خان اور حکومت سندھ سے مطالبہ کیا ہے کہ محمد عامر عباسی کے قتل کا نوٹس لیں اور دہشت گردوں کو قانون کے کٹہرے میں لائیں۔رابطہ کمیٹی نے دعا کی کہ اللہ تعالیٰ محمد عامر عباسی کو جنت الفردوس میں اعلیٰ مقام عطا فرمائے اور لواحقین کو صبر جمیل عطا کرے۔(آمین)دریں اثناء کے ایم او سی ابراہیم حیدری سیکٹر کے کارکن محمد عامر عباسی کی نمازِ جنازہ بعد نماز ظہر جامع مسجد مقدس سیکٹر 51Bمیں اداکی گئی جبکہ تدفین 51Bکے مقامی قبرستان میں کی گئی ۔نماز جنازہ تدفین میں ایم کیو ایم کراچی مضافاتی آرگنائزنگ کمیٹی کے انچارج فرخ اعظم و دیگر اراکین بھی موجود تھے۔