عالمی منڈی میں پیٹرولیم مصنوعات کی قیمتوں میں مسلسل کمی کے باوجود ’’کے الیکٹرک ‘‘ کی جانب سے بجلی کے نرخوں میں کمی نہ کرناشہریوں کے ساتھ کھلی ناانصافی ہے، حق پرست ارکان سندھ اسمبلی

کراچی ۔۔۔10، فروری 2016ء 

متحدہ قومی موومنٹ کے ارکان سندھ اسمبلی نے کہا ہے کہ عالمی منڈی میں پیٹرولیم مصنوعات کی قیمتوں میں مسلسل کمی کے باوجود7 ’’کے الیکٹرک ‘‘ کی جانب سے بجلی کے نرخوں میں کمی نہ کرناشہریوں کے ساتھ کھلی ناانصافی ہے اور کے الیکٹرک انتظامیہ کے شہریوں کو ریلیف فراہم کرنے کے دعوؤں کی نفی ہے۔اپنے مشترکہ بیان میں انہوں نے کہاکہ عالمی منڈی میں پیٹرولیم مصنوعات کی قیمتوں میں کمی کا فائدہ کسی سطح پر بھی کراچی کے عوام کو نہیں دیاجارہا ہے اور کے الیکٹرک بھی اپنے اصولوں اور پالیسیوں کے برعکس شہریوں کو اس ضمن میں ریلیف دینے سے جان چھوڑا رہی ہے جس کی جتنی بھی مذمت کی جائے کم ہے ۔ انہوں نے کہاکہ اب جب کہ کے الیکٹرک کو عالمی منڈی میں پیٹرولیم مصنوعات کی قیمتوں میں کمی کے باعث مسلسل فائدہ پہنچ رہا ہے تو اسے شہر میں اپنی ٹرانسمیشن لائنوں کی دھلائی اور فرسودہ نظام کی تبدیلی پر توجہ دینی چاہئے اورا س کے ساتھ ساتھ بجلی کے نرخ کم کرکے اپنے صارفین کو فائدہ بھی پہنچانا چاہئے تاکہ شہریوں کا اعتماد کے الیکٹرک پر بحال ہوسکے ۔ انہوں نے کہاکہ عوام پہلے ہی کے الیکٹر ک کی جانب سے بجلی کی غیر اعلانیہ اورطویل لوڈشیڈنگ سے تنگ ہیں اور آئے روز احتجاج پر مجبور ہوتے ہیں جو اس بات کاثبوت ہے کہ کے الیکٹرک کی کارکردگی پر سے عوامی کااعتماد اٹھ رہا ہے ۔ انہوں نے کہاکہ عوامی اعتماد کی بحالی کیلئے بھی یہ ضروری ہے کہ کے الیکٹر ک اپنی پالیسیوں میں عوامی مفاد عامہ کو اولیت دے اور عالمی منڈی میں پیٹرولیم مصنوعات کی قیمتوں کا فائدہ براہِ راست صارفین کو پہنچائے ۔ حق پرست ارکان سندھ اسمبلی نے حکومت سے مطالبہ کیا کہ کے الیکٹر ک کی جانب سے کراچی کے شہریوں کو عالمی منڈی میں پیٹرولیم مصنوعات کی قیمتوں میں کمی کے باوجود ربجلی کے نرخوں میں ر یلیف کی عدم فراہمی کا نوٹس لیاجائے اور کے الیکٹر ک کوبجلی کے نرخوں میں کمی کا فی الفور پابند کیاجائے ۔