کشمیری عوام کو اپنی قسمت کا فیصلہ خود کرنے کا مکمل حق دیا جائے، الطاف حسین

لندن۔۔۔4،فروری2016ء

متحدہ قومی موومنٹ کے قائد جناب الطاف حسین نے کہاہے کہ ایم کیوایم مظلوم کشمیری عوام کے ساتھ ہے اور انکے حقوق کیلئے دنیا کے ہر فورم پر آواز اٹھاتی رہے گی۔یوم یکجہتی کشمیرکے موقع پر اپنے ایک بیان میں جناب الطاف حسین نے کہاکہ مسئلہ کشمیر گزشتہ کئی عشروں سے حل طلب ہے اور پاکستان اور بھارت دونوں ممالک جب تک مسئلہ کشمیرکیلئے ہونے والے مذاکرات میں کشمیری عوام اور ان کے نمائندہ رہنماؤں کو شامل نہیں کریں گے اس دیرینہ مسئلہ کا نتیجہ خیز حل برآمد نہیں ہوسکتا۔ انہوں نے کہا کہ اس حوالے سے ایم کیوایم کا واضح مؤقف ہے کہ مسئلہ کشمیرکے لئے ہونے والے تمام مذاکرات میں کشمیری عوام اور ان کی نمائندہ قیادت کو شامل کیا جائے اور کشمیری عوام کو اپنی قسمت کا فیصلہ خود کرنے کا مکمل حق دیا جائے۔جناب الطاف حسین نے کہاکہ کشمیر،کشمیریوں کا ہے اور ایم کیوایم مظلوم کشمیری عوام کے جائز حقوق کیلئے دنیا بھر میں انسانی حقوق کے ہرفورم پر آواز اٹھاتی رہے گی ۔انہوں نے کشمیری عوام کے حقوق کی جدوجہد میں جام شہادت نوش کرنے والے تمام شہداء کو زبردست خراج عقیدت بھی پیش کیا۔