کراچی جناح ٹرمینل پر پی آئی اے کے پرامن احتجاجی مظاہرین پر فائرنگ ، لاٹھی چارج ، شیلنگ پر رابطہ کمیٹی کااظہار مذمت

کراچی ۔۔۔2، فروری 2016ء 

متحدہ قومی موومنٹ کی رابطہ کمیٹی نے کراچی میں پی آئی اے کے پرامن احتجاجی مظاہرین پر رینجرز ، پولیس اور انتظامیہ کی فائرنگ ، لاٹھی چارج ، شیلنگ اور تشدد کی سخت ترین الفاظ میں مذمت کی ہے اور فائرنگ کے نتیجے میں ایک زخمی کی ہلاکت اور متعدد ملازمین اورصحافیوں کے زندگی و موت کی کشمکش میں مبتلا ہونے پر گہرے دکھ اور افسوس کااظہار کیا ہے ۔ ایک بیان میں رابطہ کمیٹی نے کہاکہ پی آئی اے کے ملازمین پر لاٹھی چارج جمہوری دورِ حکومت میں آمریت کی بد ترین مثال ہے اور حکومت نے ثابت کردیا ہے کہ وہ پی آئی اے ملازمین کے جائز مطالبات کو تسلیم کرنے کے بجائے اپنی ہٹ دھرمی پر نہ صرف قائم ہے بلکہ ریاستی طاقت اورمشینری کے ذریعے پی آئی اے ملازمین کے احتجاج کو دبانا چاہتی ہے ۔ رابطہ کمیٹی نے کہاکہ نجکاری کے خلاف گزشتہ کئی عرصے سے پی آئی اے کے ملازمین احتجاج پر مجبور ہیں اور اپنا پرامن احتجاج ریکارڈ کراکر حکومت توجہ اپنی جانب مبذول کراتے رہے ہیں لیکن حکومت کی جانب سے پی آئی اے ملازمین کے احتجاج کو نہ صرف نظر انداز کیا گیا بلکہ آج تو پرامن احتجاج مظاہرین پر ظلم کی انتہاء کردی گئی ہے ۔رابطہ کمیٹی نے کہاکہ پی آئی اے کی نجکاری کا مسئلہ پی آئی اے کے ملازمین کے تحفظات دور کرکے کیاجائے پرامن مظاہرین کے ساتھ جس طرح ملک کے دیگر حصوں میں ریاستی طاقت اورمشینری کے استعمال کی پالیسی ترک کرکے افہام و تفہیم سے معاملات حل کئے گئے ہیں ایسا ہی طرز عمل پی آئی اے کی نجکاری کے خلاف کراچی میں بھی اختیارکیاجائے اور ظلم و ستم کا رویہ بند کیاجائے ورنہ حکومتی ظلم کے نتائج کسی طرح بھی ملک و قوم کے مفاد میں نہیں ہوسکتے ۔رابطہ کمیٹی فائرنگ سے پی آئی اے کے ایک ملازم کے جاں بحق ہونے پرگہرے دکھ اور افسوس کااظہار کیا اور مقتول کے تمام سوگوار لواحقین سے دلی تعزیت وہمدردی کااظہار کرتے ہوئے انہیں صبر کی تلقین کی ۔ رابطہ کمیٹی نے زخمیوں کی جلد ومکمل صحت یابی کیلئے اللہ تعالیٰ کے حضور خصوصی دعا بھی کی ۔ رابطہ کمیٹی نے وزیراعظم پاکستان نواز شریف اور وزیراعلیٰ سندھ قائم علی شاہ سے مطالبہ کیا کہ پی آئی اے ملازمین پر تشدد ، فائرنگ ، شیلنگ اور لاٹھی چارج میں ملوث انتظامیہ کے عناصر کے خلاف فی الفور تادیبی کاروائی عمل میں لائی جائے اور ہلاک وزخمی ہونے والے پی آئی اے ملازمین کو معاوضہ کی ادائیگی یقینی بنائی جائے