جامعہ کراچی و جامعہ این ای ڈی کے مالی بحران کا فی الفور نوٹس لیا جائے۔ سید حیدر عباس رضوی

کراچی ۔۔۔13، اگست2013ء 

ایم کیو ایم رابطہ کمیٹی کے رکن سید حیدر عباس رضوی نے جامعہ کراچی و جامعہ این ای ڈی کے فنڈز کی عدم دستیابی اور اس کے نتیجے میں پیدا ہونے والے شدید مالی بحران پر شدید تشویش کا اظہار کرتے ہوئے کہا کہ جامعہ کراچی اور جامعہ این ای ڈی اس وقت شدید مالی بحران کا شکار ہیں اور ان جامعات کے پاس اپنے ملازمین کو تنخواہوں کی ادائیگی تک کے لئے رقم نہیں ۔ انہوں نے وزیراعظم پاکستان اور ایچ ای سی سے مطالبہ کیا کہ وہ جامعات کے مالی بحران کے حل میں اپنا فوری کردار اداکرتے ہوئے ان جامعات کو فی الفور خصوصی گرانٹ فراہم کرنے کے احکامات صادر کریں تاکہ جامعات کو درپیش مالی بحران سے نکالا جاسکے اور زیر تعلیم ہزاروں طلباء و طالبات کو تعلیمی سرگرمیاں جاری رکھنے میں کوئی دشواری نہ پیش آئے۔ انہوں نے واشگاف الفاظ میں اس حقیقت سے آگاہ کرتے ہوئے کہا کہ مالی ضروریات پورا کرنے اور بنکوں کے قرضے اتارنے کے لئے تحقیقی و تخلیقی منصوبوں کو روک کر رقوم دوسری مد میں لگانے کا عمل انتہائی افسوسناک ہے جو نہ صرف علم دشمنی ہے بلکہ طلباء و طالبات اور ملک و قوم کے مستقبل پر انتہائی مضر اثرات مرتب کرے گا۔