جمیل الدین عالی مرحوم کی ملک و قوم کیلئے خدمات کو فراموش نہیں کیا جاسکتا ، رابطہ کمیٹی ایم کیوایم

کراچی ۔۔۔23، نومبر2015ء 

متحدہ قومی موومنٹ کی رابطہ کمیٹی نے معروف دانشور ، ادیب ، شاعر ، بینکر ، نقاد ، ڈرامہ تجزیہ و کالم نگار، انجمن اردو ترقی کے ممبر اور سابق حق پرست سینیٹر جمیل الدین عالی کے انتقال پر گہرے دکھ اور افسوس کااظہار کیا ہے ۔ ایک تعزیتی بیان میں رابطہ کمیٹی نے جمیل الدین عالی مرحوم کی ملک و قوم کیلئے خدمات کو فراموش نہیں کیا جاسکتا اور مرحوم نے اپنی پوری زندگی علم کے حصول اور اور فروغ کیلئے جس طرح کام کیا وہ آنے والی نسلوں کیلئے مشعل راہ ہے ۔رابطہ کمیٹی نے کہا کہ جمیل الدین عالی اپنی ذات میں مکمل شخصیت تھے اوران کے پاس موجود علم ملک و قوم کیلئے سرمایہ کی حیثیت رکھتا ہے اور آج جمیل الدین عالی کا اس دنیاسے رخصت ہوجانے سے قوم ایک قیمتی اثاثے سے محروم ہوگئی ۔ رابطہ کمیٹی نے جمیل الدین علی مرحوم کے تمام سوگوار لواحقین سے دلی تعزیت وہمدردی کااظہار کرتے ہوئے انہیں صبر کی تلقین کی اور دعا کی کہ اللہ تعالیٰ مرحوم کو اپنی جواررحمت میں اعلیٰ مقام عطا فرمائے اور سوگواران کو یہ صدمہ برداشت کرنے کا حوصلہ عطاکرے ۔ (آمین)