بارش متاثرین کی بھر پور مدد کرنے پر رابطہ کمیٹی، حق پرست نمائندگان اور ایم کیوایم کے ذمہ داران و کارکنان کو الطاف حسین کا خراج تحسین

لندن:۔ ۔۔6، اگست2013ء 

متحدہ قومی موومنٹ کے قائدجناب الطاف حسین نے حالیہ بارشوں اورسیلابی پانی سے متاثرین کی بھرپورمددکرنے پرایم کیوایم کی رابطہ کمیٹی ،حق پرست ارکان قومی وصوبائی اسمبلی اور ایم کیوایم کے ذمہ داران وکارکنان کوزبردست خراج تحسین پیش کیاہے اورکہاہے کہ ایم کیوایم کے ذمہ دارن وکارکنان نے جس طرح اپنی جانوں کی پرواکیے بغیر متاثرہ علاقوں میں جاکرمصائب کا شکارلوگوں کی مددکی ہے وہ نہ صرف ناقابل فراموش ہے بلکہ یہی ایم کیوایم کااصل مشن ومقصد ہے۔ انہوں نے کہا کہ ایم کیوایم دکھی انسانیت کی خدمت پریقین رکھتی ہے اورآج ایم کیوایم کے ذمہ داران وکارکنان نے ایک بارپھرثابت کردیاکہ وہ تمام ترنامناسب حالات کے باوجودمصائب ومشکلات میں پھنسے ہوئے عوام کے ساتھ ہیں اوران کے دکھ دردمیں پوری طرح شریک ہیں۔انہوں نے کراچی کے علاقے کے بی آرمیں نالے میں بہنے والی کارمیں ڈوب کرجاں بحق ہونیوالے اے پی ایم ایس اوکے کارکن انجینئرمظفرخان ،ان اہلیہ اورمعصوم بچے سمیت سادات امروہہ سوسائٹی میں سیلابی پانی کے ریلے سے ڈوبنے والے حیدرعباس رضوی کی ہلاکت پردلی رنج وغم کااظہار کیا اورانکی مغفرت ،درجات کی بلندی اورسوگواران کے صبرجمیل کیلئے دعاکی ۔جناب الطاف حسین نے ایک بارپھر رابطہ کمیٹی،کراچی تنظیمی کمیٹی،سندھ تنظیمی کمیٹی اورمضافاتی آرگنائزنگ کمیٹی سمیت تمام حق پرست ارکان قومی وصوبائی اسمبلی کوخراج تحسین پیش کیا۔