ایم کیوایم شعبہ اطلاعات کے کارکن محمد ہاشم شہید کے ماورائے عدالت قتل کے بارے میں رینجرز کی تحقیقاتی رپورٹ کو مسترد کرتے ہیں۔ رابطہ کمیٹی

کراچی ۔۔۔ 9 اکتوبر 2015 ء

متحدہ قومی موومنٹ کی رابطہ کمیٹی نے ایم کیوایم شعبہ اطلاعات کے کارکن محمدہاشم شہید کے ماورائے عدالت قتل کے بارے میں رینجرز کی تحقیقاتی رپورٹ کو مستردکردیاہے۔ اپنے ایک بیان میں رابطہ کمیٹی نے کہاکہ محمدہاشم شہیدکے ماورائے عدالت قتل کو ایم کیوایم کے اندرونی عناصرکی کارروائی قراردینا حقائق کے سراسر خلاف ہی نہیں بلکہ قابل مذمت بھی ہے۔رابطہ کمیٹی نے سوال کیاکہ ایم کیوایم کے جن درجنوں کارکنوں کوان کے اہل خانہ کے سامنے گرفتارکرکے ماورائے عدالت قتل کیاگیا، جن کی تشددزدہ لاشیں ملیں کیاان سب کوبھی ایم کیوایم نے مارا؟ کیااب یہ کہاجائے گاکہ رینجرزکی وردیوں میں ملبوس جولوگ روزانہ شہرکے مختلف علاقوں سے ایم کیوایم کے ذمہ داروں اورکارکنوں کوگرفتارکرکے انہیں غائب کررہے ہیں وہ سب بھی رینجرزکے اہلکارنہیں بلکہ ایم کیوایم کے کارکن ہیں ؟ رابطہ کمیٹی نے کہاکہ اس صورتحال کا حل یہی ہے کہ سپریم کورٹ کے ججوں پر مشتمل ایک اعلیٰ سطحی عدالتی کمیشن قائم کیاجائے جوتمام ماورائے عدالت قتل کے واقعات کی اعلیٰ سطحی تحقیقات کرے اورجوبھی اس میں ملوث ہوں ان کے خلاف قانون کے تحت سخت کارروائی کی جائے۔