بہادر آباد میں مسلح دہشت گردوں کی فائرنگ سے پولیس اہلکاروں کی شہادت کا واقعہ قابل مذمت ہے۔ رابطہ کمیٹی ایم کیوایم

کراچی ۔۔۔ 8 اکتوبر2015ء

متحدہ قومی موومنٹ کی رابطہ کمیٹی نے کراچی کے علاقے بہادرآبادمیں مسلح دہشت گردوں کی فائرنگ سے دوپولیس اہلکاروں کی شہادت کے واقعہ کی شدید الفاظ میں مذمت کی ہے۔اپنے ایک بیان میں رابطہ کمیٹی نے کہاکہ اس سے قبل بھی پولیس اہلکاروں کونشانہ بنائے جانے کے کئی واقعات ہوچکے ہیں لیکن اب تک ان واقعات میں ملوث دہشت گردوں کو گرفتارنہیں کیا جاسکا ہے۔ انہوں نے کہا کہ شہر میں جار ی ٹارگٹڈ آپریشن کے باوجود پولیس اہلکاروں کونشانہ بنائے جانے کے واقعات کا تسلسل کے ساتھ رونماہوناتمام شہریوں کے لئے باعث تشویش ہے۔ رابطہ کمیٹی نے کہا کہ وقت آگیاہے کہ کراچی میں جاری ٹارگٹڈ آپریشن کی سمت درست کی جائے اورسیاسی بنیادوں پر کارروائیاں کرنے کے بجائے ان اصل دہشت گردوں کے خلاف کارروائی کی جائے جوپولیس اہلکاروں کونشانہ بنارہے ہیں اورنہایت آزادی کے ساتھ دہشت گردی کی کارروائیاں کررہے ہیں۔رابطہ کمیٹی نے دہشت گردی کے ان واقعات پر پولیس کے محکمہ کے افسر وں اورجوانوں سے دلی ہمدردی کااظہارکیا۔ رابطہ کمیٹی نے مسلح دہشت گردوں کی فائرنگ سے شہید ہونے والے پولیس اہلکاروں کے لواحقین سے دلی تعزیت کااظہارکیااوردعاکی کہ اللہ تعالیٰ انہیں یہ صدمہ برداشت کرنے کاحوصلہ عطاکرے۔