مرکزی رابطہ کمیٹی کے رکن محمد کمال ملک کی گرفتاری سراسر ظلم ہے۔ رابطہ کمیٹی متحدہ قومی موومنٹ

کراچی ۔۔۔ 8 اکتوبر 2015ء

متحدہ قومی موومنٹ کی رابطہ کمیٹی نے رینجرزکی جانب سے مرکزی رابطہ کمیٹی کے رکن محمدکمال ملک کی گرفتاری کی شدید مذمت کی ہے اورگرفتاری کوسراسر ظلم قرار دیاہے ۔ اپنے ایک بیان میں رابطہ کمیٹی نے کہاکہ رینجرز کی بھاری نفری نے بدھ اورجمعرات درمیانی شب تقریباً ڈھائی بجے نارتھ ناظم آبادبلاک ایف میں مرکزی رابطہ کمیٹی کے رکن کمال ملک کے گھر پر چھاپہ مارا اور کوئی وجہ بتائے بغیرانہیں حراست میں لے لیا۔ قانون نافذ کرنے والے اداروں کے اہلکار دیواریں پھلانگ کرگھرمیں داخل ہوئے اوران کوحراست میں لے لیااورگرفتاری کی کوئی وجہ نہیں بتائی۔ رینجرز کے اہلکارتقریباًدوگھنٹہ تک ان کے گھرمیں رہے ۔سرکاری اہلکاروں نے ان کے گھرکی تلاشی لی اورکمال ملک کے تمام ذاتی اسناد، انشورنس اورگھرسے متعلق تمام کاغذات اپنے ساتھ لے گئے ۔ سرکاری اہلکار اپنے ساتھ ان کے گھرپرلگے ہوئے سی سی ٹی وی کی ریکارڈنگ بھی اپنے ساتھ لے گئے ۔ محمدکمال ملک کونامعلوم مقام پر منتقل کردیاگیاہے۔ رینجرز اہلکاروں نے کمال ملک کی گرفتاری کی کوئی وجہ نہیں بتائی اور یہ بھی نہیں بتایاکہ انہیں کہاں لے جایاجارہاہے۔رابطہ کمیٹی نے کہاکہ کمال ملک کادوسال قبل ہی لیور ٹرانسپلانٹ ہواہے اوران کی طبیعت ٹھیک نہیں ہے جس کی وجہ سے وہ اوران کا14سالہ بیٹااور11سالہ بیٹی بہت پریشان ہیں۔محمدکمال ملک اس سے قبل گلبرگ کے ٹاؤن ناظم بھی رہ چکے ہیں۔ رینجرزکے اعلیٰ حکام کمال ملک کی گرفتاری سے لاعلمی کااظہارکررہے ہیں جس سے انکی زندگی کواورخطرہ لاحق ہے ۔ رابطہ کمیٹی نے کمال ملک کی گرفتاری کی شدیدمذمت کرتے ہوئے کہاکہ کمال ملک جگرکے عارضے میں مبتلاہیں، انکی طبیعت خراب ہے اورایسے بیمارشخص کو بلاجواز گرفتار کرنا سراسرظلم اورزیادتی ہے ۔انہوں نے کہاکہ کمال ملک ایک مریض ہیں ،ان کی حالت ناگفتہ بہ ہے اوروہ کسی قسم کاٹارچربرداشت نہیں کرسکتے لہٰذ انہیں کسی قسم کاتشددنہ کیاجائے ۔انہوں نے مطالبہ کیاکہ کمال ملک کوفی الفوررہاکیاجائے۔رابطہ کمیٹی نے انسانی حقوق کی تنظیموں سے اپیل کی کہ وہ ایم کیوایم کے رہنماؤں اورکارکنوں کی بلاجوازگرفتاریوں اورتشددکانوٹس لیں اوراس ظلم کے خلا ف آوازبلندکریں۔