عالمی منڈی میں پیٹرولیم مصنوعات کی قیمتوں میں کمی کے ثمرات سے عوام کو مکمل طور پر مستفید نہیں کیا گیا ہے، مستعفی اراکین صوبائی اسمبلی

کراچی ۔۔۔2، ستمبر2015ء

متحدہ قومی موومنٹ کے مستعفی اراکین صوبائی اسمبلی نے کہا ہے کہ عالمی منڈی میں پیٹرولیم مصنوعات کی قیمتوں میں کمی کے ثمرات سے عوام کومکمل طور پرمستفید نہیں کیا گیا اور پٹرول کے مصنوعی بحران سے عوام کو فی الفور نجات دلائی جائے ۔ اپنے مشترکہ بیان میں انہوں نے کہاکہ عالمی منڈی میں پیٹرولیم مصنوعات کی قیمتوں میں جس تناسب سے کمی آئی ہے اس تناسب سے حکومت نے عوام کو ریلیف نہیں دیا ہے ۔ انہوں نے کہاکہ حکومت نے پیٹرول کی قیمتوں میں عالمی منڈی کے تناسب سے آدھی قیمتوں میں کمی کی تھی اور پٹرول کی آدھی قیمتوں میں کمی کو بھی پیٹرول پمپ مالکان نے مسترد کردیا اور اس کا فائدہ عوام کو نہیں پہنچنے دیا بلکہ پٹرول پمپ ہی بند کرڈالے جس کے باعث عوام کے روز مرہ کے معمولات شدید متاثر ہوئے اور انہیں دفاتر ، اسپتال ، اسکول ، کالج حتیٰ کہ ایمبولینس سروس کیلئے بھی پریشانی کا سامنا رہا۔ انہوں نے کہا کہ حکومت نے پیٹرول کی قیمتوں میں آدھی کمی کی جو عوام کیلئے سود مند ہونے کے بجائے مزید عذاب لے آئی اور عوام دن بھر حکومت کے اس قدام پر بھی در بدر کی ٹھوکریں کھاتے رہے جس کی جتنی بھی مذمت کی جائے کم ہے ۔ انہوں نے کہاکہ حکومت کو اپنی پالیسی پر نظر ثانی کرنی چاہئے اور عوام کو ریلیف کی فراہمی کے فیصلے کرتے وقت اس بات کا خیال رکھناچاہئے کہ ان فیصلوں کا اطلاق جن پر کیاجارہا ہے کیا انہیں پہلے سے پابند کردیا گیا ہے اور نہیں کیا گیا ہے تو اس سلسلے میں مثبت اور ٹھو س اقدامات کرنے چاہئے تھے ۔ مستعفی ارکان صوبائی اسمبلی نے حکومت سے مطالبہ کیا کہ ملک بھر سے پٹرول کے مصنوعی بحران کا خاتمہ کیاجائے اور عوام کو پٹرول کی مد میں فراہم کئے گئے ادھورے ریلیف کے فیصلے پرفوری طور پر نظر ثانی کی جائے اور پیٹرولیم مصنوعات میں ہونے والی حالیہ کمی کے ثمرات مکمل طور سے عوام تک پہنچائے جائیں ۔