شاہ فیصل کالونی، کورنگی اور محمود آباد میں ایم کیوایم کے کارکنان کے گھروں پر چھاپے، 9ذمہ داران و کارکنان کو گرفتار کرلیا گیا
شاہ فیصل کالونی سے 7کارکنان اور کورنگی سے 2 اورمحمودآباد سے ایک کارکن کو گرفتار کیا گیا
گرفتار شدہ ذمہ داران و کارکنان کو نامعلوم مقام پر منتقل کردیا گیا ، اہل خانہ شدید تشویش میں مبتلا ہیں
کراچی ۔۔۔20، اگست2015ء
پولیس،رینجرز اور سادہ لباس اہلکاروں نے گزشتہ شب کراچی کے علاقوں شاہ فیصل کالونی، کورنگی اور محمود آباد کے علاقوں میں ایم کیوایم کے کارکنان کے گھروں پر بغیروارنٹ کے چھاپے مارے اورایم کیوایم کے 9ذمہ داران و کارکنان کو گرفتار کرکے نامعلوم مقام پر منتقل کردیا ۔ تفصیلات کے مطابق سرکاری اہلکاروں نے ایم کیوایم شاہ فیصل سیکٹر یونٹ 108کے کارکنوں اعجاز ، رانا مقصود ولد عمر ،شاہ فیصل سیکٹر یونٹ 107کے کارکنوں کمال ولد ہاشم کمال ، ارشد نوید ولد عمر، یونٹ 106کے کارکن الطاف حیدر ولد یاسین ، شاہ فیصل سیکٹر یونٹ 105کے کارکنوں ندیم ولد ننھے خان اور ذیشان ولد بدر الدین کو گرفتار کرلیا ۔ سرکاری اہلکاروں نے کورنگی کے علاقے میں چھاپے مارکر ایم کیوایم کورنگی سیکٹر یونٹ 75کے ایریا انچارج عمران اور یونٹ 70کے کارکن قاسم کو گرفتارکرلیا ۔ اسی طرح پولیس اور سادہ لباس اہلکاروں نے ایم کیوایم محمود آباد سیکٹر یوسی 2کے کارکن عاطف فضل ولد محمد فضل کو غیر قانونی طور پر گرفتار کرلیا اور انہیں تشدد کا نشانہ بناتے ہوئے اپنے ہمراہ لے گئے ۔ گرفتار کئے جانے والے کارکنان کے اہل خانہ سخت تشویش میں مبتلا ہیں اور اب تک گرفتار کارکنان و ذمہ داران کے حوالے سے یہ معلوم نہیں ہوپارہا ہے کہ انہیں کہاں رکھا گیا ہے ۔