ایم کیوایم کے قائد الطاف حسین کا نائن زیرو اور لیاقت نیشنل اسپتال میں رابطہ کمیٹی کے ارکان اور دیگر ذمہ داران سے مسلسل فون پر رابطہ، رکن قومی اسمبلی رشید گوڈیل کی خیریت دریافت کی

لندن ۔۔۔ 18 اگست 2015ء

متحدہ قومی موومنٹ کے قائدجناب الطاف حسین ایم کیوایم کے مرکزنائن زیرواورلیاقت نیشنل اسپتال میں موجود رابطہ کمیٹی کے ارکان اور دیگر ذمہ داران سے مسلسل فون پر رابطے میں ہیں۔ انہوں نے رابطہ کمیٹی کے ارکان اورذمہ داران سے ایم کیوایم کے رکن قومی اسمبلی رشید گوڈیل کی خیریت دریافت کی اورانہیں سختی سے تاکید کی کہ رشید گوڈیل کے علاج معالجہ اورہرقسم کی سہولت فراہم کی جائے ۔ جناب الطاف حسین نے رشید گوڈیل کے ڈرائیور متین کی شہادت پر دلی تعزیت کا اظہار کیا اوررابطہ کمیٹی کوہدایت کی کہ وہ متین شہید کی میت ان کے آبائی گاؤں بٹگرام پہنچانے کے انتظامات کریں اورشہید ڈرائیور کی تجہیز وتکفین کے انتظامات کے سلسلے میں ان کے لواحقین کے ساتھ مکمل مالی تعاون کریں۔ اس کے ساتھ ساتھ شہید ڈرائیورکے گھرپر سوئم تک کھانے پینے کے اخراجات کیلئے مالی تعاون کریں۔جناب الطاف حسین نے دعاکی کہ اللہ تعالیٰ ڈرائیورمتین شہیدکی مغفرت فرمائے، انہیں جنت الفردوس میں جگہ عطاکرے اور شہید کے سوگوار لواحقین کویہ ناقابل تلافی صدمہ برداشت کرنے کاحوصلہ عطاکرے