صدرپاکستان منتخب ہونے پر ممنون حسین کوقائد تحریک الطاف حسین کی مبارکباد
امید ہے کہ نومنتخب صدرپاکستان ،قومی یکجہتی کے فروغ، جمہوریت کے استحکام، دہشت گردی کے خاتمہ اورعوامی مسائل کے حل کیلئے اپنا بھرپورکردار ادا کریں گے، الطاف حسین
ممنون حسین کی کامیابی پر میاں نوازشریف ،میاں شہبازشریف ، مسلم لیگی اوردیگر سیاسی ومذہبی جماعتوں کے رہنماؤں ، کارکنوں اور عوام کو الطاف حسین کی مبارکباد
لندن۔۔۔30، جولائی2013ء
متحدہ قومی موومنٹ کے قائد جناب الطاف حسین نے صدارتی انتخابات میں پاکستان مسلم لیگ (ن) کے امیدوار جناب ممنون حسین کو بھاری اکثریت سے صدرپاکستان منتخب ہونے پر اپنی ، متحدہ قومی موومنٹ کے رہنماؤں اورکارکنوں کی جانب سے دلی مبارکباد پیش کی ہے ۔ایک بیان میں جناب الطاف حسین نے امید ظاہر کی کہ نومنتخب صدرپاکستان ،قومی یکجہتی کے فروغ، جمہوریت کے استحکام، صوبوں کے درمیان بہترتعلقات کے قیام،معیشت کی بہتری، دہشت گردی کے خاتمہ اور لوڈ شیڈنگ سمیت دیگر عوامی مسائل کے حل کیلئے اپنا بھرپورکردار ادا کریں گے اورملک بھر کے عوام کو انصاف فراہم کریں گے ۔جناب الطاف حسین نے کہاکہ صدرپاکستان جناب ممنون حسین ، کسی ایک جماعت یا کمیونٹی کے نہیں بلکہ پورے پاکستان کے عوام کے صدر ہیں، وہ ان کے بھی صدر ہیں جنہوں نے انہیں صدارتی انتخابات میں ووٹ دیئے اور انکے بھی صدر ہیں جنہوں نے انہیں ووٹ نہیں دیئے ، امیدہے کہ وہ صدرمملکت کی حیثیت سے سب کے ساتھ یکساں سلوک کریں گے۔جناب الطاف حسین نے کہاکہ پاکستان کو اندرونی وبیرونی چیلنجوں کا سامنا ہے اورملک نازک دور سے گزررہا ہے ۔ وقت کا تقاضا ہے کہ تمام محب وطن سیاسی جماعتیں پاکستان کی سلامتی وبقاء کیلئے اتحاد ویکجہتی کامظاہرہ کریں اورسیاسی مفادات کو بالائے طاق رکھتے ہوئے پاکستان کی ترقی وخوشحالی کیلئے مل جل کرکام کریں تاکہ پاکستان میں جمہوریت کوفروغ اور جمہوری اداروں کو مستحکم کیاجاسکے ۔جناب الطاف حسین نے صدارتی انتخابات میں پاکستان مسلم لیگ (ن) کے امیدوارکی کامیابی پر وزیراعظم میاں محمد نوازشریف ، وزیراعلیٰ پنجاب میاں شہبازشریف ، مسلم لیگ کے دیگر تمام رہنماؤں ،تمام سیاسی ومذہبی جماعتوں کے رہنماؤں ، کارکنوں اور ملک بھرکے عوام کو دلی مبارکباد پیش کی ۔