بلدیاتی الیکشن میں ایم کیوایم بھر پور طریقے سے حصہ لے گی، رکن رابطہ کمیٹی اسلم شاہ آفریدی

کراچی ۔۔۔31، جولائی 2015ء

متحدہ قومی موومنٹ کی رابطہ کمیٹی کے رکن اسلم شاہ آفریدی نے کہا ہے کہ آئندہ بلدیاتی الیکشن میں ایم کیوایم بھر پور طریقے سے حصہ لے گی اور بھاری اکثریت سے کامیابی حاصل کرے گی ، ذمہ داران و کارکنان بلدیاتی الیکشن کے سلسلے میں تمام کام مکمل رکھیں اور عوامی رابطے شروع کردیں ۔ان خیالات کااظہار انہوں نے گزشتہ روز خورشید بیگم سیکریٹریٹ عزیز آباد میں ایم کیوایم پختون آرگنائزنگ کمیٹی کے ذمہ داران و کارکنان کے اجلاس سے خطاب کرتے ہوئے کیا۔ اپنے خطاب میں انہوں نے کہاکہ ماضی کے عام انتخابات اور بلدیاتی انتخابات میں تما م قومیتوں کے عوام نے ایم کیوایم کے امیداوروں کو بھاری اکثریت سے ووٹ دیکر کامیاب کروایا ہے جو جناب الطاف حسین پر عوام کے اعتماد کا کھلا ثبوت ہے ۔ انہوں نے کہاکہ موجودہ حالات میں ایم کیوایم کو ریاستی آپریشن کے نام پر ظلم و جبر کا نشانہ بنایا جارہا ہے ، کارکنان و ذمہ داران کے گھروں پر چھاپے و گرفتاریوں کا سلسلہ جاری ہے اور ایک ایسا تاثر دیا جارہا ہے کہ شہر اور ملک کی تمام خرابیوں کی جڑ ایم کیوایم ہے اور یہ تاثر بھی دراصل اس لئے پیدا کیاجارہا ہے تاکہ آئندہ بلدیاتی انتخابات میں ایم کیوایم کو کامیابی حاصل کرنے سے روکا جاسکے ۔ انہوں نے کہاکہ ایم کیوایم کی جدوجہد اصولی ہے اور جناب الطاف حسین اس جدوجہد سے کسی طور پر دستبردار نہیں ہوں گے اور جناب الطاف حسین کے ساتھ جدوجہد میں ذمہ داران و کارکنان ساتھ ساتھ ہیں اور کسی بھی ظلم و ستم کے ہتھکنڈے کے آگے سر نہیں جھکائیں گے ۔ رکن رابطہ کمیٹی اسلم شاہ آفریدی نے ذمہ داران و کارکنان پر زور دیا کہ وہ متحرک رہیں اور قائدتحریک جناب الطا ف حسین کے خطابات اور بیانات کا بغور مطالعہ کریں۔