بھارت کے سابق صدر اور عظیم سائنسداں ڈاکٹر اے پی جےعبدالکلام کے انتقال پرایم کیوایم کے قائدالطاف حسین کا اظہارتعزیت

لندن۔۔27جولائی 2015ء 

متحدہ قومی موومنٹ کے قائد جناب الطاف حسین نے بھارت کے سابق صدر اوردنیا کے عظیم سائنسداں ڈاکٹر اے پی جے عبدالکلام کے اچانک انتقال پر گہرے دکھ اوردلی افسوس کا اظہار کیا ہے۔ ایک بیان میں جناب الطاف حسین نے کہا کہ ڈاکٹرعبدالکلام نے سائنس کے شعبہ میں جو خدمات انجام دی ہیں وہ نمایاں ہیں۔اگرچہ ڈاکٹرعبدالکلام ایک بہت بڑے سائنسداں تھے لیکن اس کے باوجود ان میں تکبر یا غرور بالکل بھی نہیں تھا ،بحیثیت انسان وہ نہایت سادہ طبیعت کے مالک اورخوش اخلاق تھے،وہ عزت آبرو اورتہذیب ورواداری کا شاندار نمونہ تھے ۔ وہ بچوں میں بچوں کی طرح ،یوتھ میں یوتھ کی طرح اور بڑوں میں بڑوں کی طرح بن جایا کرتے تھے ۔ڈاکٹراے پی جے عبدالکلام کے انتقال سے دنیا خصوصاً مسلم امہ ایک بہت بڑے سائنسداں سے محروم ہوگئی ہے اور ان کا خلابرسوں پر نہیں ہوسکتا ۔جناب الطاف حسین نے دعاکی کہ اللہ تعالیٰ ڈاکٹرعبدالکلام کی مغفرت فرمائے، انہیں جنت الفردوس میں اعلیٰ مقام عطا فرمائے اور ان کے سوگواران ،تمام پسماندگان اورچاہنے والوں کو یہ صدمہ برداشت کرنے کا حوصلہ دے ۔