پارہ چنار میں ہونے والے خودکش دھماکے بدترین دہشت گردی ہیں، جناب الطاف حسین

کراچی۔۔۔۔26جولائی2013ء

متحدہ قومی موومنٹ کے قائدجناب الطاف حسین نے کرم ایجنسی کے علاقے پاراچنارمیںیکے بعددیگرے خودکش حملوں کی سخت ترین الفاظ میں مذمت کی ہے اور اسے بدترین دہشت گردی قراردیتے ہوئے اس کے نتیجے میں متعددافرادکے جاں بحق اورزخمی ہونے پردلی افسوس کااظہارکیاہے۔ایک بیان میں جناب الطاف حسین نے کہاکہ ملک دشمن عناصرپاکستان کوغیرمستحکم اورکمزورکرنے کیلئے دہشت گردی کاسہارالے رہے ہیں اورنہ صرف معصوم شہریوں،پاک فوج ،سیکوریٹی اہلکاروں بلکہ قومی اداروں اوربزرگان دین کے مزارت کونشانہ بنارہے ہیں۔انہوں نے پاراچنارخودکش حملوں میں جاں بحق ہونے والے افرادکی مغفرت ،ان کے درجات کی بلندی اور سوگوار لواحقین سے دلی ہمدردی کااظہارکیااورزخمیوں کی جلدمکمل صحت یابی کیلئے بھی دعاکی۔جناب الطاف حسین نے صدرمملکت آصف علی زرداری،وزیراعظم میاں نوازشریف ، وفاقی وزیرداخلہ چوہدری ثنارعلی اورخیبرپختونخواہ حکومت سے مطالبہ کیا ہے کہ پاراچنارمیں خودکش حملوں کاسختی سے نوٹس لیاجائے اورحملوں میں ملوث دہشت گرداوران کے سرپرستوں کوگرفتارکرکے عبرتناک سزادی جائے۔